លោកជំទាវរដ្ឋមន្ត្រីក្រសួងកិច្ចការនារី អញ្ជើញជួបសំណេះសំណាលជាមួយថ្នាក់ដឹកនាំ និងមន្ត្រីរាជការនៃមន្ទីរកិច្ចការនារី ខេត្តតាកែវ
ភ្នំពេញ៖ នាព្រឹកថ្ងៃអង្គារ ៤កើត ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០៩ ខែកក្កដា ឆ្នាំ២០២៤ លោកជំទាវកិត្តិបណ្ឌិត អុឹង កន្ថាផាវី រដ្ឋមន្ត្រីក្រសួងកិច្ចការនារី អមដំណើរដោយថ្នាក់ដឹកនាំ និងមន្រ្តីបច្ចេកទេសនៃក្រសួងកិច្ចការនារី បានអញ្ជើញជួបសំណេះសំណាលជាមួយថ្នាក់ដឹកនាំ និងមន្រ្តីរាជការដែលកំពុងបំពេញការងារនៅមន្ទីរកិច្ចការនារីខេត្តតាកែវ ក្នុងគោលបំណងដើម្បីពិនិត្យលើវឌ្ឍនភាពការងារដែលសម្រេចបាននាពេលកន្លងមក ក៏ដូចជាផ្តល់នូវអនុសាសន៍ណែនាំ និងតម្រង់ទិសដល់មន្ទីរកិច្ចការនារី សំដៅធ្វើយ៉ាងណាបង្កើនប្រសិទ្ធភាពការងារ និងផ្តល់សេវានានាជូនប្រជាពលរដ្ឋឱ្យបានទាន់ពេលវេលា។
ទន្ទឹមនោះ លោកជំទាវកិត្តិបណ្ឌិតរដ្ឋមន្រ្តីក៏បានគូសបញ្ជាក់អំពីសារសំខាន់នៃការអនុវត្តកម្មវិធីកែទម្រង់សំខាន់ៗរបស់រាជរដ្ឋាភិបាល នីតិកាលទី៧ ដែលក្នុងនោះកម្មវិធីកែទម្រង់រដ្ឋបាលសាធារណៈគឺជាក្របខណ្ឌគន្លឹះមួយ ដែលរាជរដ្ឋាភិបាលបានដាក់ចេញ និងតម្រូវឱ្យគ្រប់ក្រសួង-ស្ថាប័នទាំងនៅថ្នាក់ជាតិ និងថ្នាក់ក្រោមជាតិ អនុវត្តប្រកបដោយស្មារតីទទួលខុសត្រូវខ្ពស់។ ក្នុងន័យនេះ ដើម្បីធានានិរន្តរភាព និងប្រសិទ្ធភាពការងារ មន្ទីរចាំបាច់ត្រូវធ្វើការឆ្លុះបញ្ចាំង និងវិភាគមុខងារ និងភារកិច្ចខ្លួនឱ្យបានស៊ីជម្រៅ និងឆ្លើយតបទៅនឹងតម្រូវការ និងការវិវត្តន៍របស់សង្គម ផ្អែកតាមសេចក្តីណែនាំរបស់រាជរដ្ឋាភិបាល។
លោកជំទាវកិត្តិបណ្ឌិត បានណែនាំឱ្យមន្ត្រីទាំងអស់ចូលរួមបំពេញការងារប្រកបជំនាញវិជ្ជាជីវៈ បុរេសកម្ម និងសមិទ្ធកម្ម ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា និងផែនការយុទ្ធសាស្ត្រនារីរតនៈទី៦ របស់ក្រសួងកិច្ចការនារី ៕
