ឧត្តមសេនីយ៍ឯក ច័ន្ទ លំផាត់ អញ្ជើញចុះសួរសុខទុក្ខ និងត្រួតពិនិត្យសម្ភារសង្គ្រោះគ្រោះមហន្តរាយ របស់កងប្រតិបត្តិការរុករក និងសង្គ្រោះគ្រោះមហន្តរាយ លេខ៧០៤ យោធភូមិភាគទី៤

ភ្នំពេញ៖ នៅព្រឹកថ្ងៃទី១០ ខែកក្កដា ឆ្នាំ២០២៤ នៅបញ្ជាការដ្ឋានយោធភូមិភាគទី៤ ឯកឧត្តម ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ អញ្ជើញទទួលស្វាគមន៍យ៉ាងកក់ក្តៅចំពោះដំណើរអញ្ជើញរបស់ ឯកឧត្តម ឧត្តមសេនីយ៍ឯក ច័ន្ទ លំផាត់ នាយរងសេនាធិការចម្រុះ នៃកងយោធពលខេមរភូមិន្ទ និងជាអនុប្រធានគណៈកម្មាធិការជាតិគ្រប់គ្រងគ្រោះមហន្តរាយ តំណាងដ៏ខ្ពង់ខ្ពស់ ឯកឧត្តម កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ អមដំណើរដោយ ឯកឧត្តម គីម វីរៈ អគ្គលេខាធិការ នៃគណៈកម្មាធិការជាតិគ្រប់គ្រងគ្រោះមហន្តរាយ លោកប្រធាននាយកដ្ឋាន និងតំណាងមកពីកងប្រតិបត្តិការរុករក និងសង្គ្រោះគ្រោះមហន្តរាយ ក្រសួងការពារជាតិ ដែលបានចុះសួរសុខទុក្ខ និងត្រួតពិនិត្យសម្ភារសង្គ្រោះគ្រោះមហន្តរាយ របស់កងប្រតិបត្តិការរុករកនឹងសង្គ្រោះលេខ៧០៤ យោធភូមិភាគទី៤ ដើម្បីពង្រឹងសមត្ថភាពសម្រាប់ឆ្លើយតបទៅនឹងការសង្គ្រោះគ្រោះមហន្ដរាយឱ្យកាន់តែមានប្រសិទ្ធភាព។

ក្នុងឱកាសចុះសួរសុខទុក្ខ និងត្រួតពិនិត្យសម្ភារសង្គ្រោះគ្រោះមហន្តរាយ របស់កងប្រតិបត្តិការរុករកនិងសង្គ្រោះលេខ៧០៤ យោធភូមិភាគទី៤ ដើម្បីត្រៀមក្នុងការឆ្លើយតបទៅនឹងគ្រោះមហន្តរាយ នាព្រឹកថ្ងៃទី១០ ខែកក្កដា ឆ្នាំ២០២៤នេះ ឯកឧត្តម ឧត្តមសេនីយ៍ឯក ច័ន្ទ លំផាត់ អនុប្រធាន គណៈកម្មាធិការជាតិគ្រប់គ្រងគ្រោះមហន្តរាយ បានលើកទឹកចិត្តឱ្យកងកម្លាំងទាំងអស់ហ្វឹកហាត់ដុសខាត់ជំនាញឱ្យបានជាប្រចាំ ដើម្បីត្រៀមឆ្លើយតបទៅនឹងគ្រោះធម្មជាតិ និងការសង្គ្រោះលើមុខសញ្ញាផ្សេងៗទៀតជាយថាហេតុជូនប្រជាពលរដ្ឋ។

ឯកឧត្តម ឧត្តមសេនីយ៍ឯកបាន បញ្ជាក់ថាការហ្វឹកហាត់របស់កងកម្លាំងជាប់ជាប្រចាំនេះ ដើម្បីឲ្យកងកម្លាំងអាចមានសមត្ថភាពគ្រប់គ្រាន់ និងមានយុទ្ធសាស្ត្រជួយសង្គ្រោះប្រជាពលរដ្ឋបានឆាប់រហ័ស និងមិនប៉ះពាល់ដល់អាយុជីវិត។

ឯកឧត្តម ឧត្តមសេនីយ៍ឯក បានបន្តមានប្រសាសន៍ថា កងកម្លាំងត្រូវតែត្រៀមបម្រុងជាប់ជានិច្ច ព្រោះគ្រោះមហន្តរាយនឹងអាចកើតឡើងដោយ ពុំប្រាប់យើងមុននោះឡើយ។

ជាមួយគ្នានេះដែរ ឯកឧត្តមឧត្តមសេនីយ៍ឯក ក៏បានកោតសរសើរចំពោះកងកម្លាំង ដែលបានចូលរួមយ៉ាងសកម្មក្នុងការចល័តកម្លាំង ជួយក្នុងបេសកកម្មឆ្លើយតបក្នុងការជួយសង្គ្រោះប្រជាជនដែលរងគ្រោះដោយគ្រោះមហន្តរាយផ្សេងៗ កន្លងមក។

ឯកឧត្តម ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ បានឱ្យដឹងថាកងប្រតិបត្តិការរុករងនិងសង្គ្រោះលេខ៧០៤ របស់យោធភូមិភាគទី៤ បានចូលរួមចំណែកយ៉ាងសកម្មក្នុងបេសកកម្មឆ្លើយតបសង្គ្រោះគ្រោះមហន្តរាយផ្សេងៗ ពិសេស គ្រោះទឹកជំនន់។

ឯកឧត្តមបានបញ្ជាក់ថា ទូក និងសម្ភារសង្គ្រោះផ្សេងៗ ដែល ឯកឧត្តម នាយឧត្តមសេនីយ៍កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានផ្តល់ជូនកន្លងមកគឺត្រូវបានរក្សាទុកនិងថែទាំយ៉ាងល្អសម្រាប់ប្រើប្រាស់ក្នុងការជួយសង្គ្រោះប្រជាជន។ ចំពោះកងកម្លាំង ក៏ត្រូវបានបញ្ជូនឱ្យធ្វើការហ្វឹកហ្វឺនជាមួយកងពលផ្សេងៗ និងបានធ្វើការប្រជុំតាមប្រព័ន្ធវីដេអូជាមួយកងកម្លាំងសង្គ្រោះ របស់ក្រសួងគ្រប់គងគ្រោះអាសន្ន តាមប្រព័ន្ធវីដេអូ Zoom នៅទីស្តីការគណៈកម្មាធិការជាតិគ្រប់គ្រងគ្រោះមហន្តរាយ ដើម្បីដាស់តឿន និងពង្រឹងសមត្ថភាពកងកម្លាំងផងដែរ៕