ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការក្រសួងធនធានទឹក អញ្ជើញចុះពិនិត្យស្ថានភាពអាងទឹក ក្នុងភូមិសាស្ត្រខេត្តកំពង់ធំ
ភ្នំពេញ៖ ឆ្លៀតក្នុងឱកាសចុះបំពេញបេសកកម្មនៅខេត្តកំពង់ធំ ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការក្រសួងធនធានទឹក និងឧតុនិយម បានជួបសំណេះសំណាល និងពិភាក្សាការងារជាមួយថ្នាក់ដឹកនាំ និងមន្ត្រីរាជការនៃមន្ទីរធនធានទឹក និងឧតុនិយមខេត្តកំពង់ធំ និងបានចុះពិនិត្យបច្ចុប្បន្នភាពទឹកនៅតាមបណ្តាអាងទឹកនានា ក្នុងភូមិសាស្ត្រខេត្តកំពង់ធំ។
ក្នុងឱកាសនោះ ឯកឧត្តមរដ្ឋលេខាធិការប្រចាំការ និងក្រុមការងារបានអញ្ជើញចុះពិនិត្យស្ថានភាព៖ ១).អាងទឹក ៣០កញ្ញា ស្ថិតក្នុងស្រុកស្ទោង និង២).អាងទឹកស្ទឹងជីនិត ស្ថិតក្នុងស្រុកសន្ទុក ខេត្តកំពង់ធំ។
សូមជម្រាបថា អាងទឹក ៣០កញ្ញា មានសក្តានុពលបម្រើការស្រោចស្រពដល់វិស័យកសិកម្ម និងការប្រើប្រាស់ក្នុងជីវភាពរស់នៅប្រចាំថ្ងៃរបស់បងប្អូនប្រជាពលរដ្ឋក្នុងឃុំចំនួន១១ និងស្រុកចំនួន៣ នៃខេត្តកំពង់ធំ គឺស្រុកស្ទោង ស្រុកកំពង់ស្វាយ និងស្រុកប្រាសាទបល្ល័ង្ក។ ដោយឡែក អាងទឹកស្ទឹងជីនិត (១មករា) មានលទ្ធភាពស្ដុកទឹកបានប្រមាណ ៣៩លានម៉ែត្រគូប និងមានលទ្ធភាពផ្ដល់ទឹកស្រោចស្រពដល់ផ្ទៃដីបង្កបង្កើនផលរដូវវស្សាប្រមាណ ២៨០២ហិកតា និងរដូវប្រាំងប្រមាណ ២០០០ហិកតា ក្នុងស្រុកសន្ទុក និងស្រុកបារាយណ៍។ ប្រព័ន្ធធារាសាស្ត្រស្ទឹងជីនិតរួមមាន ទំនប់ ១ខ្សែប្រវែង ៧,១៥០ម៉ែត្រ ប្រឡាយរង ៧ខ្សែប្រវែង ២៩,៨៨៨ម៉ែត្រ និងសំណង់សិល្បការ្យសរុប ៩០កន្លែង ៕
