ឧបនាយករដ្ឋមន្ត្រី ស៊ុន ចាន់ថុល អនុញ្ញាតឱ្យនាយកគ្រប់គ្រងទូទៅនៃក្រុមហ៊ុន BYD Asia Pacific Auto Sales Division និងសហការី ចូលជួបសម្ដែងការគួរសម និងពិភាក្សាការងារ

ភ្នំពេញ៖ នាព្រឹកថ្ងៃទី១៥ ខែកក្កដា ឆ្នាំ២០២៤ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអនុញ្ញាតឱ្យលោក Liu Xueliang នាយកគ្រប់គ្រងទូទៅនៃក្រុមហ៊ុន BYD Asia Pacific Auto Sales Division និងសហការីចូលជួបសម្ដែងការគួរសម និងពិភាក្សាការងារ។

ក្នុងជំនួបនេះ ឯកឧត្តមឧបនាយករដ្ឋមន្ត្រី បានបង្ហាញការស្វាគមន៍ជូនទៅគណៈប្រតិភូរបស់ក្រុមហ៊ុន BYD Asia Pacific Auto Sales Division ដែលបានអញ្ជើញមកប្រទេសកម្ពុជាដើម្បីសិក្សាស្វែងយល់អំពីសក្ដានុពល និងបរិយាកាសវិនិយោគនៅកម្ពុជា ជាងនេះទៅទៀតកាលពីព្រឹកមិញនេះ ក្រុមហ៊ុនបានទទួលការអនុញ្ញាតដើម្បីចូលជួបសម្ដែងការគួរសម និងពិភាក្សាការងារ ពីសម្ដេចមហាបវរធិបតីនាយករដ្ឋមន្ត្រីផងដែរ។

ជម្រាបជូនទៅក្រុមហ៊ុននាឱកាសនេះ ឯកឧត្តមឧបនាយករដ្ឋមន្ត្រី បានជម្រាបជូនផងដែរអំពីស្ថាប័នក្រុមប្រឹក្សាអភិវឌ្ឍន៍កម្ពុជា ដែលក្នុងនាមជាសេនាធិការជូនរាជរដ្ឋាភិបាលលើកិច្ចការងារវិនិយោគ នឹងជួយសម្របសម្រួលរាល់កិច្ចការងារនានាដែលក្រុមហ៊ុនមានសំណើសុំទៅកាន់បណ្ដាភាគីពាក់ព័ន្ធក្នុងវិស័យរដ្ឋ ដើម្បីបង្កើនបរិយាកាសវិនិយោគឱ្យកាន់តែមានភាពរលូនជោគជ័យ៕