រដ្ឋមន្ត្រីក្រសួងទេសចរណ៍ នឹងដឹកនាំគណៈប្រតិភូ ចូលរួមកិច្ចប្រជុំថ្នាក់រដ្ឋមន្ត្រីទេសចរណ៍ទ្វេភាគីកម្ពុជា-ថៃ លើកទី៣ ចាប់ពីថ្ងៃទី១៧-១៨ ខែកក្កដា នៅទីក្រុងបាងកក
ភ្នំពេញ៖ តបតាមការអញ្ជើញរបស់ ឯកឧត្តម ស៊ឹមសាក់ ផុងផាត (Sermsak Pongpanit) រដ្ឋមន្ត្រីក្រសួងទេសចរណ៍ និងកីឡានៃព្រះរាជាណាចក្រថៃ និងដោយទទួលបានការអនុញ្ញាតដ៏ខ្ពង់ខ្ពស់ពី រាជរដ្ឋាភិបាលកម្ពុជា ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ នឹងដឹកនាំគ ណៈប្រតិភូក្រសួងទេសចរណ៍កម្ពុជាចូលរួមកិច្ចប្រជុំថ្នាក់រដ្ឋមន្ត្រីទេសចរណ៍ទ្វេភាគីកម្ពុជា-ថៃ លើកទី៣ ចាប់ពីថ្ងៃទី១៧-១៨ ខែកក្កដា ឆ្នាំ២០២៤ នៅទីក្រុងបាងកក ព្រះរាជាណាចក្រថៃ។
កិច្ចប្រជុំថ្នាក់រដ្ឋមន្ត្រីទេសចរណ៍ទ្វេភាគីលើកទី៣នេះ ត្រូវបានរៀបចំឡើងដោយផ្អែកលើស្មារតី នៃការអនុវត្តអនុស្សរណៈយោគយល់គ្នាស្តីពីកិច្ចសហប្រតិបត្តិការទេសចរណ៍ទ្វេភាគីរវាងកម្ពុជា និងរួមថៃ ដែលបានចុះហត្ថលេខាកាលពីឆ្នាំ២០១៤។
កិច្ចប្រជុំ នឹងផ្តោតលើចំណុចសំខាន់ៗមួយចំនួន មាន៖ (១) ពិភាក្សា ផ្លាស់ប្តូរយោបល់ និងចែករំលែកទស្សនៈនានាស្តីពីការអភិវឌ្ឍវិស័យទេសចរណ៍ ប្រទេសទាំងពីរ (២) ធ្វើបច្ចុប្បន្នភាពផែនការសកម្មភាពរួមស្ដីពីកិច្ចសហប្រតិបត្តិការទេសចរណ៍ ២០២៣-២០២៥ និង (៣) ដាក់ចេញនូវសេចក្តីថ្លែងការណ៍រួម សំដៅបន្តពង្រឹងការអនុវត្តកិច្ចសហ ប្រតិបត្តិការទេសចរណ៍ទ្វេភាគីរវាងប្រទេសទាំងពីរ ស្របតាមការចង្អុលបង្ហាញរបស់ប្រមុខរាជរដ្ឋាភិបាល ទាំងពីរនាពេលកន្លងមក។
នាអំឡុងពេលនៃការចូលរួមកិច្ចប្រជុំនេះ ក៏នឹងមានជំនួបរវាងក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា (CTB) និងអាជ្ញាធរទេសចរណ៍ថៃ (TAT) ដើម្បីជំរុញកិច្ចសហការ និងការចូលរួមរបស់វិស័យឯកជននៃប្រទេសទាំងពីរ ឈានទៅដាក់ចេញនូវសកម្មភាពអនុវត្តរួមគ្ន ដើម្បីជំរុញលំហូរភ្ញៀវទេសចររវាងប្រទេសទាំងពីរ ក៏ដូចជាទាក់ទាញភ្ញៀវទេសចរប្រទេសទីបីមកកាន់ ប្រទេសទាំងពីរឱ្យកាន់តែច្រើនឡើងថែមទៀត ស្របតាមគំនិតផ្តួចផ្តើមយុទ្ធសាស្ត្រ “បង្កើន៥ និង អភិវឌ្ឍន៍៣” របស់ក្រសួងទេសចរណ៍ ក្នុងការពង្រីកវិសាលភាព និងជំរុញការផ្សព្វផ្សាយសក្ដានុពល ទេសចរណ៍កម្ពុជាឲ្យបានកាន់តែទូលំទូលាយទាំងក្នុងតំបន់ និងពិភពលោក៕
