សម្តេចធិបតី អំពាវនាវដល់បងប្អូនប្រជាពលរដ្ឋខ្មែរទាំងអស់ គប្បីប្រើប្រាស់ប្រព័ន្ធផ្សព្វផ្សាយ ប្រកបដោយទទួលខុសត្រូវ

ភ្នំពេញ៖ សម្តេចមហាបវរធិបតីហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអំពាវនាវដល់បងប្អូនប្រជាពលរដ្ឋខ្មែរទាំងអស់ គប្បីប្រើប្រាស់ប្រព័ន្ធផ្សព្វផ្សាយ ជាពិសេសហ្វេសប៊ុកប្រកបដោយទទួលខុសត្រូវ សូមកុំធ្វើអ្វីទៅតាមអារម្មណ៍ និងដើម្បីគេងចំណេញនយោបាយជាដើមនោះ។

ក្នុងឱកាសអញ្ជើញជាអធិបតីក្នុងពិធីបញ្ចុះបឋមសិលាសាងសង់សារមន្ទីរ សម្តេចព្រះព្រហ្មរតនមុនី ពិន សែម ស្ថិតនៅវត្តរាជបូព៌ ខេត្តសៀមរាប នៅព្រឹកថ្ងៃទី១៨ ខែកក្កដា ឆ្នាំ២០២៤នេះ សម្តេចធិបតី ហ៊ុន ម៉ាណែត បានថ្លែងថា ការផ្តល់ព័ត៌មានមិនពិត គឺនឹងធ្វើឲ្យមានបញ្ហាដល់សង្គម និងប្រទេសជាតិទាំងមូល ជាក់ស្តែងករណីនៅខេត្តកណ្តាល នាពេល កន្លងទៅថ្មីៗ ដោយផ្សាយតាមគ្នា ដោយគ្មានជាការពិត ដោយចោទប្រកាន់ដល់អាជ្ញាធរថា បិទមិនឲ្យធ្វើការដង្ហែរទីងមោង និងព័ត៌មានជាច្រើនទៀតថា មានបាតុកម្មប្រឆាំង និងរាជរដ្ឋាភិបាលនៅរាជធានីភ្នំពេញជាដើមនោះ។

សម្តេចធិបតី នាយករដ្ឋមន្ត្រី បានបន្ថែមទៀតថា ការផ្តល់ និងការទទួលមិនពិតនេះហើយនឹងនាំឲ្យប្រជាពលរដ្ឋអន្តរាយ និងគ្រោះថ្នាក់បំផុតសម្រាប់ជាតិ។

សម្តេចធិបតី ក៏បានណែនាំដល់រដ្ឋមន្រ្តីក្រសួងព័ត៌មានគប្បីត្រូវពិនិត្យ អាជ្ញាបណ្ណដល់សារព័ត៌មានណា ដែលមិនគោរពទៅតាមវិជ្ជាជីវៈរបស់ខ្លួន ហើយបន្ទាប់ពីធ្វើការណែនាំអប់រំ ហើយមិនស្តាប់ត្រូវតែដកអាជ្ញាប័ណ្ណសារព័ត៌មាននោះចូលបញ្ជីខ្មៅ ដោយឈប់ផ្តល់ដល់ពួកគេទាំងនោះជារៀងរហូតផងដែរ ៕