ឧត្តមសេនីយ៍ទោ អ៊ូ សុបុណ្ណា អញ្ជើញបិទវគ្គបណ្តុះបណ្តាល ស្តីពីលំហាត់របៀបការស្លៀកពាក់ឯកសណ្ឋាន និងក្រមសីលធម៌វិជ្ជាជីវៈនគរបាល តួនាទីភារកិច្ច និងសិទ្ធិរបស់ប្រជាការពារ

ភ្នំពេញ៖ នៅព្រឹកថ្ងៃទី១៩ ខែកក្កដា ឆ្នាំ២០២៤ លោកឧត្តមសេនីយ៍ទោ អ៊ូ សុបុណ្ណា ស្នងការ នៃស្នងការដ្ឋាននគរបាលខេត្តក្រចេះ បានអញ្ជើញជាអធិបតីក្នុងពិធីបិទវគ្គបណ្តុះបណ្តាល ស្តីពីលំហាត់របៀបការស្លៀកពាក់ឯកសណ្ឋាន និងក្រមសីលធម៌វិជ្ជាជីវៈនគរបាល តួនាទីភារកិច្ច និងសិទ្ធិរបស់ប្រជាការពារ។

ក្នុងឱកាសនោះ លោកឧត្តមសេនីយ៍ទោ អ៊ូ សុបុណ្ណា បានមានប្រសាសន៍ ឲ្យសិក្ខាកាម ដែលត្រូវចូលរៀនវគ្គបណ្ដុះបណ្ដាលខាងលើទាំងអស់ ត្រូវយកចំណេះដឹង ដែលបានសិក្សា អនុវត្តឲ្យបានល្អប្រសើរ និងធ្វើជាមន្ត្រីល្អ ខិតខំប្រឹងប្រែងបំរើការងារជូនបងប្អូនប្រជាពលរដ្ឋ ឲ្យបានកាន់តែល្អប្រសើរ។

ជាមួយនោះដែរ លោកឧត្តមសេនីយ៍ទោ ស្នងការ ក៏បានពាំនាំប្រសាសន៍ផ្តាំផ្ញើសួរសុខទុក្ខ និងអរគុណ កោតសរសើរ ការសាមគ្គីភាពផ្ទៃក្នុង ដល់ មន្ត្រីនគរបាល នៃស្នងការដ្ឋាននគរបាលខេត្តក្រចេះ ដែលបានខិតខំប្រឹងប្រែង ថែរក្សា ការពារសន្តិសុខ សុវត្ថិភាព រៀបចំសណ្ដាប់ធ្នាប់សាធារណៈ ជូនដល់ពុកម៉ែបងប្អូនប្រជាពលរដ្ឋ នៅក្នុងពេលកន្លងទៅ ប្រកបដោយភាពល្អប្រសើរ ៕