ឧត្តមសេនីយ៍ទោ សោម ស៊ុន បន្តដឹកនាំកម្លាំងចម្រុះ ត្រួតពិនិត្យការកាប់ទន្ទ្រានព្រៃឈើយកដីធ្វើកម្មសិទ្ធិ នៅតំបន់វាលធំ ក្នុងភូមិសាស្រ្តព្រៃឡង់
ភ្នំពេញ៖ នៅព្រឹកថ្ងៃទី ២៤ ខែកក្កដា ឆ្នាំ២០២៤ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានអចិន្ត្រៃយ៍គណៈកម្មការការពារ គ្រប់គ្រង និងបង្ក្រាបទល្មើសធនធានធម្មជាតិ ក្នុងភូមិសាស្ត្រខេត្តកំពង់ធំ បានបន្តដឹកនាំកងកម្លាំងទាំងបី មន្ត្រីជំនាញ នៃ ស្ថាប័ន បរិស្ថាន ទៅត្រួតពិនិត្យសកម្មភាពការកាប់ទន្ទ្រានព្រៃឈើយកដីធ្វើកម្មសិទ្ធិ របស់ក្រុមជនល្មើសក្នុងភូមិសាស្ត្រតំបន់វាលធំ ស្ថិតក្នុងតំបន់ ព្រៃ ឡង់ ក្នុងឃុំសុចិត្រ ស្រុកសណ្ដាន់ខេត្តកំពង់ធំ។
លោក ណុប ឆៃយ៉ា មន្ត្រី ស្ថាប័ន ជំនាញ បរិស្ថាន ខេត្តកំពង់ធំ ប្រចាំ ការ នៅ ទី បញ្ជាការ ស្រាល តំបន់ អូឃ្មង ក្នុង ភូមិ សាស្ត្រ តំបន់ ព្រៃ ឡង់ បានបញ្ជាក់ថា តំបន់ដែលមានការកាប់បំផ្លាញនេះឈ្មោះហៅថាតំបន់វាលធំ ក្នុងតំបន់ព្រៃឡង់ ស្ថិតនៅក្នុងឃុំសុចិត្រ ស្រុកសណ្ដាន់ ខេត្តកំពង់ធំ ដែលមានផ្ទៃដីប្រមាណ ៩ ហិកតា ដែល ជាផ្ទៃដីត្រូវបានជនល្មេីសលួចកាប់ទន្ទ្រានថ្មីក្នុងរដូវប្រាំង កន្លង ទៅ នេះ នៅក្នុងចន្លោះមុនពេលចូលឆ្នាំថ្មីប្រពៃណីខ្មែរ មុនពេលកងកម្លាំងចម្រុះមកបំពេញបេសកកម្មការពារ ទប់ស្កាត់ និង បង្រាប បទ ល្មើស ធនធាន ធម្មជាតិ ។
ឧត្តមសេនីយ៍ទោ សោម ស៊ុន ក្នុងនាមអនុប្រធានអចិន្ត្រៃយ៍គណៈកម្មការការពារ គ្រប់គ្រង និងបង្ក្រាបបទល្មើសធនធានធម្មជាតិខេត្តកំពង់ធំ បានថ្លែងនូវការសោកស្ដាយចំពោះការបាត់បង់នូវធនធានធម្មជាតិ ដែលត្រូវរងការកាប់ទន្ទ្រានយកដីធ្វើជាកម្មសិទ្ធិពី សំណាក់ ជនល្មើស និងបានណែនាំដល់កងកម្លាំង ប្រដាប់ អាវុធ ទាំង បី និង មន្ត្រី ដែលមានការពាក់ព័ន្ធ ត្រូវ រួម គ្នា គ្រប់គ្រងឲ្យបាននូវផ្ទៃដីដែលបានកាប់ទន្ទ្រានយកដោយខុសច្បាប់ទាំងនេះ ឲ្យបានគង់វង្ស នឹងដាច់ខាតត្រូវស្រាវជ្រាវវែករកមុខសញ្ញាជនល្មើស ដើម្បីកសាងសំណុំរឿងបញ្ជូនទៅតុលាការ ផ្ដន្ទាទោស តាមផ្លូវច្បាប់ជាធរមាន ដោយគ្មានការលើកលែងឡើយ។ ហេីយ ត្រូវ បន្ត សកម្មភាព ការពារ ទប់ស្កាត់ និង បង្រាប បទ ល្មើស ធនធាន ធម្មជាតិ ឲ្យ មាន ប្រសិទ្ធភាព បន្ថែម ទៀត ដោយ គ្មាន ការ ដកថយ ឡេីយ ៕
