ព្រះខ័នរាជស្វាយរៀង ឡើងទៅវគ្គចែកពូល Shopee Cup ក្រោយទម្លាក់ក្រុម Young Elephants របស់ឡាវ

កីឡា៖ នៅរាត្រីថ្ងៃទី២៤ ខែកក្កដា ឆ្នាំ២០២៤ ក្រុមព្រះខ័នរាជស្វាយរៀង របស់កម្ពុជា បានឡើងវគ្គចែកពូល នៃការប្រកួតជើងឯកក្លិបបាល់ទាត់អាស៊ាន ឆ្នាំ២០២៤/២៥ (ASEAN Club Championship Shopee Cup 2024/25) ហើយ ក្រោយបន្ដយកឈ្នះក្រុម Young Elephants ដោយលទ្ធផល ៥-១ ក្នុងជំនួបវគ្គជម្រុះជើងទី២ នេះ នៅពហុកីឡដ្ឋានជាតិអូឡាំពិក រាជធានីភ្នំពេញ ដោយសរុបទាំង ២ជើង ក្រុមជើងឯកលីគកំពូលកម្ពុជា បានយកឈ្នះក្រុមជើងឯកលីគកំពូលឡាវ ៨-៣។

ជំនួបកាត់សេចក្ដីក្នុងដីនេះ កីឡាករ Takumu Nishihara បានស៊ុតបាល់ពិន័យ ១១ម៉ែត្រ ជួយឲ្យក្រុម Young Elephants នាំមុខក្រុមម្ចាស់ផ្ទះ ១គ្រាប់មុន នៅនាទីទី៩ ក្រោយការបង្កកំហុសក្នុងប្រអប់គ្រោះថ្នាក់ពីខ្សែការពារ សឿយ វិសាល។ យ៉ាងណាមិញ ព្រះខ័នរាជស្វាយរៀង នៅតែបន្ដគ្រប់គ្រងបាល់បានច្រើន រហូតវាយបកបាន ២គ្រាប់មកវិញ នៅចុងវគ្គទី១ ដែលបញ្ចប់ទីដោយកីឡាករ Christian Dos Santos នៅនាទី៣៩ និងមិត្ដរួមក្រុម Pablo Augusto នៅនាទី៤១។

ចូលវគ្គទី២ ក្រុមជើងឯកលីគកំពូលកម្ពុជា នៅតែបន្ដដាក់សម្ពាធលើក្រុមភ្ញៀវ ក្នុងនោះខ្សែប្រយុទ្ធប្រេស៊ីល Pablo Augusto ដែលខកខានឱកាសជាច្រើន កាលពីជំនួបជើងទី១ បានបន្ថែម ៣គ្រាប់ទៀត នៅនាទី៥៣, នាទី៦១ និងនាទី៧៤ មុនផ្លាស់ប្ដូរចេញនៅនាទី៧៥។

ស្របពេលក្រុមម្ចាស់ផ្ទះ នាំមុខ ៥-១ នៅសល់រយៈពេលជាង ១០នាទីចុងក្រោយ ព្រះខ័នរាជស្វាយរៀង មិនអាចរកគ្រាប់បាល់បន្ថែមទៀតឡើយ ដោយរក្សាលទ្ធផលនាំមុខ ៥-១ ដល់ចប់ការប្រកួតពេញម៉ោង៕