ឯកឧត្តម អឿង ចន្ថា អនុរដ្ឋលេខាធិការក្រសួងធនធានទឹក បើកសិក្ខាសាលាពិគ្រោះយោបល់ស្តីពីការកំណត់ទំនប់ និងអាងស្តុកទឹកពីចម្ងាយ

ភ្នំពេញ៖ នៅថ្ងៃសុក្រ ទី២៦ ខែកក្កដា ឆ្នាំ២០២៤នេះ ឯកឧត្តមសាស្រ្តាចារ្យបណ្ឌិត អឿង ចន្ថា អនុរដ្ឋលេខាធិការក្រសួងធនធានទឹក និងឧតុនិយម បានអញ្ជើញបើកសិក្ខាសាលាពិគ្រោះយោបល់ស្តីពីការកំណត់ទំនប់ និងអាងស្តុកទឹកពីចម្ងាយនៅកម្ពុជា (Remote Detection of Dams and Reservoirs in Cambodia)។

សូមជម្រាបថា សិក្ខាសាលាពិគ្រោះយោបល់កម្រិតថ្នាក់ជាតិនេះ បាន រៀបចំឡើងដោយធនាគារពិភពលោកសហការជាមួយក្រសួងធនធានទឹក និងឧតុនិយម រយៈពេលពេញ ១ថ្ងៃ ដោយមានការចូលរួមពីក្រសួង-ស្ថាប័ន និងដៃគូអភិវឌ្ឍន៍ពាក់ព័ន្ធចំនួន២៣ សរុបប្រមាណ ៤០នាក់។

ឯកឧត្តមអនុរដ្ឋលេខាធិការបានឱ្យដឹងថា ធនាគារពិភពលោក បានគាំទ្រដល់ក្រសួងធនធានទឹក និងឧតុនិយម ក្នុងការពិនិត្យឡើងវិញនូវក្របខណ្ឌច្បាប់ស្តីពីសុវត្ថិភាពទំនប់ និងការធ្វើផែនទីទំនប់ និងអាងស្តុកទឹកនៅកម្ពុជា ហើយ សិក្ខាសាលានេះមានគោលបំណង ដើម្បីពិភាក្សា និងពិគ្រោះយោបល់ជាមួយក្រសួង-ស្ថាប័ន និងដៃគូអភិវឌ្ឍន៍ពាក់ព័ន្ធនានា លើការរកឃើញ និងអនុសាសន៍សំខាន់ៗពីការពិនិត្យឡើងវិញនូវក្របខណ្ឌច្បាប់ស្តីពីសុវត្ថិភាពទំនប់ និងការកំណត់ទំនប់ និងអាងស្តុកទឹកពីចម្ងាយនៅកម្ពុជា។

ជាមួយគ្នានេះ ឯកឧត្តមរដ្ឋលេខាធិការ បានបញ្ជាក់ឱ្យដឹងថា លទ្ធផលដែលទទួលបានតាមរយៈសិក្ខាសាលាខាងលើរួមមាន៖ ទី១)ទទួលបានធាតុចូលសម្រាប់បំពេញបន្ថែមលើសេចក្តីព្រាងរបាយការណ៍ស្តីពីការកំណត់ទំនប់ និងអាងស្តុកទឹកពីចម្ងាយនៅកម្ពុជា ទី២)លទ្ធផលនៃការសិក្សាត្រូវបានពិនិត្យ ពិភាក្សា កែសម្រួល សម្រួច និងទទួលបានការឯកភាពពីក្រសួង-ស្ថាប័ន និងដៃគូអភិវឌ្ឍន៍ពាក់ព័ន្ធនានា ដែលជាអនុសាសន៍សំខាន់ៗសម្រាប់ដាក់បញ្ចូលក្នុងសេចក្តីព្រាងរបាយការណ៍នេះ និងទី៣)អ្នកចូលរួមពីតំណាងក្រសួង-ស្ថាប័ន និងដៃគូអភិវឌ្ឍន៍ពាក់ព័ន្ធនានា មានការយល់ដឹងកាន់តែស៊ីជម្រៅអំពីក្របខណ្ឌច្បាប់ស្តីពីសុវត្ថិភាពទំនប់ និងការធ្វើផែនទីទំនប់ និងអាងស្តុកទឹកនៅកម្ពុជា ពិតជាមានសារសំខាន់ណាស់សម្រាប់គម្រោងកែលម្អសន្តិសុខទឹកកម្ពុជា៕