គណៈកម្មការទី៣ នៃរដ្ឋសភា ចុះពិនិត្យគម្រោងសាងសង់ទីលានចាក់សំរាម ដែលមានទីតាំងស្ថិតនៅភូមិកោះរកា ឃុំកោះរកា ស្រុកកំពង់សៀម

ភ្នំពេញ៖ នារសៀលថ្ងៃទី២៩ ខែកក្កដា ឆ្នាំ២០២៤ គណៈប្រតិភូនៃគណៈកម្មការផែនការ វិនិយោគ កសិកម្ម រុក្ខាប្រមាញ់​ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម​ នៃរដ្ឋសភា ដឹកនាំដោយ​ ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការ អមដំណើរដោយ ឯកឧត្តម ហេង វណ្ណនី អភិបាលរងខេត្ត តំណាងដ៏ខ្ពង់ខ្ពស់​ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងលោកប្រធានមន្ទីរបរិស្ថានខេត្តកំពង់ចាម បានអញ្ជើញចុះពិនិត្យគម្រោងសាងសង់ទីលានចាក់សំរាម (ជាគម្រោង ADB) ដែលមានទីតាំងស្ថិតនៅភូមិកោះរកា ឃុំកោះរកា ស្រុកកំពង់សៀម ខេត្តកំពង់ចាម។

តាមប្រសាសន៍លោកប្រធានមន្ទីរបរិស្ថានខេត្ត ជាលទ្ធផលនៃការសាងសង់ ជារួមគម្រោងទាំងមូលបានស្ថាបនារួចរាល់ជាង៩០%ហើយ ដោយគ្រោងនឹងបញ្ចប់ នៅចុងខែកក្កដា ឆ្នាំ២០២៤ ខាងមុខនេះ គឺមុនផែនការដែលបានកំណត់ ៕