ឧត្តមសេនីយ៍ទោ សិទ្ធិ ឡោះ ដាក់ចេញផែនការត្រៀម បង្ការ ដើម្បីជួយសង្គ្រោះ ពលរដ្ឋតាមក្រុង ស្រុកទាំង៩ ដែលអាចប្រឈមបញ្ហានានា នាពេលរដូវវស្សា
ភ្នំពេញ៖ ដោយគិតគួពីបញ្ហាប្រឈមនានា និងសុខសុវត្ថិភាព របស់ប្រជាពលរដ្ឋនារដូវវស្សានេះ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានដាក់បទបញ្ជាឱ្យតាម បណ្តាអធិការដ្ឋាននគរបាលក្រុង/ស្រុកទាំង ៩ ព្រមទាំងបញ្ជាការដ្ឋាននគរបាលការពារព្រំដែនគោកទាំង៤ ត្រៀម បង្ការ លក្ខណៈជាស្រេចគ្រឿងបំពាក់ មាន សម្ភារៈ ទូក អាវពង ឡាន និងកងកម្លាំងត្រៀម ដើម្បីត្រៀមជួយ និងចុះជួយឱ្យទាន់ហេតុការណ៍ មិនថាយប់ ឬ ថ្ងៃ ដើម្បីជួយបងប្អូនប្រជាពលរដ្ឋរងគ្រោះ ។
ដោយការយកចិត្តទុកដាក់និងក្តីព្រួយបារម្ភ លោកឧត្តមសេនីយ៍ទោ សិទ្ធិ ឡោះ ក៏បានការដាក់ចេញនូវផែនការនេះ ធ្វើឡើងបន្ទាប់ពីប៉ុន្នានថ្ងៃចុងក្រោយនេះ មានភ្លៀងធ្លាក់ឥតឈប់ឈរ ហើយបានបញ្ជាឱ្យកម្លាំងនគរបាលខេត្តបន្ទាយមានជ័យ នៅតាមគោលដៅត្រៀមលក្ខណៈជាស្រេចដើម្បីចេញជួយសង្គ្រោះ និងត្រៀមជួយជម្លៀសពលរដ្ឋគ្រប់ពេលវេលា ។
ជាមួយគ្នានេះផងដែរស្នងការដ្ឋាននគរបាលខេត្តបន្ទាយមានជ័យ សូមធ្វើការអំពាវនាវបងប្អូនប្រជាពលរដ្ឋ សូមមានការប្រុងប្រយ័ត្នខ្ពស់ នារដូវវស្សា និង ប្រសិនជួបនូវបញ្ហាផ្សេងៗសូមទាក់ទងមកនគរបាលដែលនៅជិតបងប្អូន ដើម្បីភាពងាយស្រួលជួយអន្តរាគមន៍ជួយសង្រ្គោះឱ្យបានទាន់ពេលវេលា ៕
