ទីក្រុង Kyiv អញ្ជើញរដ្ឋមន្ត្រីការបរទេសចិន ទៅបំពេញទស្សនកិច្ចនៅអ៊ុយក្រែន

បរទេស៖ អ្នកនាំពាក្យរបស់ក្រសួងការបរទេសទីក្រុង Kyiv បានឲ្យដឹងនៅថ្ងៃអង្គារថា រដ្ឋាភិបាលអ៊ុយក្រែនបានអញ្ជើញរដ្ឋមន្ត្រីការបរទេសចិន លោក Wang Yi ទៅបំពេញទស្សនកិច្ចនៅអ៊ុយក្រែនហើយទីក្រុងប៉េកាំងបានចង្អុលបង្ហាញថាខ្លួនចាប់អារម្មណ៍នៅក្នុងសំណើនេះ។

រដ្ឋមន្ត្រីការបរទេសអ៊ុយក្រែន លោក Dmytro Kuleba បានជួបជាមួយសមភាគីចិនកាលពីសប្តាហ៍មុន ក្នុងអំឡុងទស្សនកិច្ចក្នុងសម័យសង្គ្រាមលើកដំបូងរបស់លោកទៅកាន់ប្រទេសចិន ដែលជាកន្លែងដែលអ្នកទាំងពីរបានពិភាក្សាជាមួយគ្នាជាងបីម៉ោង។

អ្នកនាំពាក្យក្រសួងការបរទេស លោក Heorhii Tykhyi បានប្រាប់ថា យើងត្រៀមខ្លួនជាស្រេចដើម្បីស្វាគមន៍លោករដ្ឋមន្ត្រី Wang Yi ក្នុងប្រទេសអ៊ុយក្រែន ដើម្បីមើលឃើញដោយផ្ទាល់ភ្នែកនូវផលវិបាកនៃការឈ្លានពានរបស់រុស្ស៊ីមកលើប្រទេសរបស់យើង និងធ្វើការពិភាក្សាទ្វេភាគីកាន់តែស៊ីជម្រៅជាមួយលោកលើបញ្ហាទ្វេភាគី តំបន់ និងអន្តរជាតិមួយចំនួន។

ប្រទេសចិនបានដាក់ជំហរខ្លួនឯងថាជាអព្យាក្រឹតចំពោះសង្គ្រាម ប៉ុន្តែបានប្រកាសភាពជាដៃគូគ្មានដែនកំណត់ជាមួយរុស្ស៊ីប៉ុន្មានថ្ងៃមុនពេលការឈ្លានពានពេញលេញរបស់ទីក្រុងម៉ូស្គូលើអ៊ុយក្រែននៅឆ្នាំ២០២២ ហើយបានធ្វើជាម្ចាស់ផ្ទះទទួលប្រធានាធិបតីរុស្ស៊ី លោក Vladimir Putin សម្រាប់កិច្ចពិភាក្សានៅក្នុងខែឧសភា។