អ្នកនាំពាក្យក្រសួងព័ត៌មាន៖ ការប្រមូលមតិយោបល់ពីវិស័យសារព័ត៌មានដើម្បីបង្កើតធម្មនុញ្ញវិជ្ជាជីវៈសារព័ត៌មាននៅកម្ពុជា

ភ្នំពេញ៖ ថ្នាក់ដឹកនាំក្រសួងព័ត៌មានក្នុងរាជរដ្ឋាភិបាលអាណត្តិទី៧នេះ បានផ្តើមគំនិតបង្កើតធម្មនុញ្ញវិជ្ជាជីវៈសារព័ត៌មានមួយមិនធ្លាប់មាននៅកម្ពុជាក្នុងកិច្ចប្រឹងប្រែងសហការជាមួយគ្រប់ភាគីពាក់ព័ន្ធទាំងអស់ ក្នុងការផ្តោតការយកចិត្តទុកដាក់លើការគ្រប់គ្រង លំហព័ត៌មាន សំដៅធានាសន្តិសុខព័ត៌មាន ព្រមទាំងលើកកម្ពស់គុណភាព និងប្រសិទ្ធភាពនៃប្រព័ន្ធផ្សព្វ ផ្សាយឱ្យស្រប តាមសម័យកាល និងតម្រូវការក្នុងសង្គមបច្ចុប្បន្ន និងទៅអនាគត។

ក្រសួងព័ត៌មានបានរៀបចំសិក្ខាសាលាចំនួន២លើកហើយដែលលើកទី១កាលពីថ្ងៃទី២៩មេសាឆ្នាំ២០២៤ និងដោយឡែកកាលពីថ្ងៃទី២៤កក្កដាឆ្នាំ២០២៤ ជាលើកទី២ នៅទីស្តីការក្រសួងព័ត៌មាន ដោយមានការសម្របសម្រួលពីក្រសួងព័ត៌មាន និងមានការចូលរួមពី អ្នកសារព័ត៌មានទាំងប្រព័ន្ធផ្សព្វផ្សាយប្រពៃណីនិងទំនើប តំណាងអង្គការ UNESCO អង្គភាពសារព័ត៌មាន សមាគមអ្នក សារព័ត៌មានក្នុងប្រទេសកម្ពុជា ព្រមទាំងមន្ត្រីទទួលបន្ទុកព័ត៌មានពីស្ថាប័នផ្សេងទៀត សរុបជាង ២០០នាក់។ សិក្ខាសាលាទាំង២លើកនេះបាន ស្រង់មតិយោបល់ និងសំណូមពរពីអ្នកសារព័ត៌មាន និងសមាគមអ្នកសារព័ត៌មានដើម្បីប្រមូលធាតុចូលសម្រាប់ធ្វើសេចក្តីព្រាង ធម្មនុញ្ញវិជ្ជាជីវៈសារព័ត៌មាននេះ។

ឯកឧត្តម ទេព អស្នារិទ្ធ អនុរដ្ឋលេខាធិការនិងជាអ្នកនាំពាក្យក្រសួងព័ត៌មានបានប្រាប់ក្រុមការងារផ្សព្វផ្សាយព័ត៌មានតាមប្រព័ន្ធអ៉ីនធើណេតក្រសួងព័ត៌មាននៅថ្ងៃទី៣១កក្កដានេះថា ការរៀបចំសិក្ខាសាលាទាំង២លើកនេះបានបើកទូលាយដល់ការចូលរួមពីសំណាក់តួអង្គពាក់ព័ន្ធទាំងអស់ក្នុងវិស័យព័ត៌មាននិងសោតទស្សន៍ ក្នុងដំណើរការរៀបចំ «ធម្មនុញ្ញវិជ្ជាជីវៈសារព័ត៌មាន» នេះ។

ឯកឧត្តម ទេព អស្នារិទ្ធ បន្តថា ការចូលរួមពីសំណាក់ភាគីពាក់ព័ន្ធទាំងអស់ក្នុងសិក្ខាសាលានេះ ជាព្រឹត្តិការណ៍ប្រវត្តិសាស្ត្រមួយសម្រាប់វិស័យ ព័ត៌មាននិងសោតទស្សន៍ តាមរយៈការពិភាក្សា ការផ្លាស់ប្តូរយោបល់ ការលើកឡើងជាសំណូមពរ យ៉ាងទូលំទូលាយលើ សេចក្តីព្រាងធម្មនុញ្ញវិជ្ជាជីវៈសារព័ត៌មាន សម្រាប់កិច្ចសហការរួមគ្នាលើកកម្ពស់សណ្តាប់ធ្នាប់ និងគុណតម្លៃវិជ្ជាជីវៈសារ ព័ត៌មាន។
ការផ្តល់មតិ យោបល់ និងការលើកឡើង សំណូមពរទាំងអស់បានទទួលតាមរយៈសិក្ខាសាលាធំៗពីរលើក ដែលមានអ្នកចូលរួមសរុបជាង៥០០នាក់ ក្នុងដំណើរការពិគ្រោះយោបល់ សុទ្ធសឹងជាធាតុចូលចាំបាច់ទាំងអស់ ហើយត្រូវបានកត់ត្រាទុកដោយម៉ត់ចត់ ត្រឹមត្រូវ ច្បាស់លាស់ សម្រាប់ការតាក់តែងសេចក្តីព្រាងធម្មនុញ្ញវិជ្ជាជីវៈសារព័ត៌មាននេះ។ ធាតុចូលទាំងនោះបានផ្តោតលើទិដ្ឋភាពសីលធម៌និងការទទួលខុសត្រូវសង្គម ទិដ្ឋភាពវិជ្ជាជីវៈ សិទ្ធិ ករណីយកិច្ច និងការទទួលខុសត្រូវក្នុងក្របខណ្ឌច្បាប់ គោលការណ៍គ្រឹះនិងនិយាមអប្បបរមាក្នុងការអនុវត្តសកម្មភាពវិជ្ជាជីវៈ ព្រមទាំងទិដ្ឋភាពទាក់ទងនឹងអនុលោមភាព ឯករាជភាព និងអព្យាក្រឹត្យភាពរបស់អ្នកសារព័ត៌មាន។

អ្នកនាំពាក្យក្រសួងព័ត៌មានបានបញ្ជាក់ទៀតថា ក្រោយពេលអនុម័តរួច «ធម្មនុញ្ញវិជ្ជាជីវៈសារព័ត៌មាន» នេះនឹងក្លាយជាស្តង់ដាប្រតិបត្តិក្រមសីលធម៌វិជ្ជាជីវៈរបស់ជាតិ សម្រាប់គ្រប់តួអង្គពាក់ព័ន្ធទាំងអស់ គោរព និងប្រតិបត្តិតាម ដើម្បីធានាការលើកកម្ពស់គុណភាពការងារអាជីព សីលធម៌សង្គម និងតម្លៃវិជ្ជាជីវៈសម្រាប់វិស័យព័ត៌មាននិងសោតទស្សន៍កម្ពុជា។

យោងតាមសេចក្តីប្រកាសព័ត៌មានរបស់ការិយាល័យអ្នកនាំពាក្យក្រសួងព័ត៌មានបានអោយដឹងថា បន្ទាប់ពីសិក្ខាសាលាទាំងនោះហើយ ក្រសួងព័ត៌មាននឹងបន្តសម្របសម្រួលប្រមូលធាតុចូលទាំងឡាយពីអ្នកពាក់ព័ន្ធ ដែលអាច ផ្តល់យោបល់ និងធាតុចូលចាប់ពីថ្ងៃទី២៤ ខែកក្កដា ឆ្នាំ២០២៤ នេះ រហូតដល់ ថ្ងៃទី០២ ខែសីហា ឆ្នាំ២០២៤ខាងមុខនេះទៀត៕