ឯកឧត្តម អាន ពេជ្រ ហត្ថដា ដឹកនាំកិច្ចប្រជុំស្ដីពីការ តាមដាន ត្រួតពិនិត្យ និងវាយតម្លៃការអនុវត្តយុទ្ធសាស្ត្រ ផែនការអភិវឌ្ឍន៍ និងគោលនយោបាយនានារបស់ក្រសួងធនធានទឹក និងឧតុនិយម

ភ្នំពេញ៖ នៅទីស្ដីការក្រសួង នា ថ្ងៃទី៣១ ខែកក្កដា ឆ្នាំ២០២៤នេះ ឯកឧត្តមបណ្ឌិត អាន ពេជ្រ ហត្ថដា រដ្ឋលេខាធិការ បានដឹកនាំកិច្ចប្រជុំលើកទី១ ស្ដីពីការតាមដាន ការត្រួតពិនិត្យ និងការវាយតម្លៃការអនុវត្តយុទ្ធសាស្ត្រ ផែនការអភិវឌ្ឍន៍ និងគោលនយោបាយនានារបស់ក្រសួងធនធានទឹក និង ឧតុនិយម។

ឯកឧត្តមរដ្ឋលេខាធិការបានបញ្ជាក់ថា កិច្ចប្រជុំនាពេល នេះ មានគោលបំណង ដើម្បីផ្សព្វផ្សាយ និងណែនាំដល់ក្រុមការងារ អំពីគោលការណ៍ណែនាំ យន្តការ និងសេចក្តីព្រាងឯកសារនានា សម្រាប់ការតាមដាន ការត្រួតពិនិត្យ និងការវាយតម្លៃលើការអនុវត្តផែនការយុទ្ធសាស្ត្របញ្ចកោណ ដំណាក់កាលទី១ ដែលបានរៀបចំដោយ អគ្គលេខាធិការដ្ឋាន នៃគណៈកម្មាធិការតាមដាន ត្រួតពិនិត្យ និងវាយតម្លៃ ការអនុវត្តយុទ្ធសាស្ត្របញ្ចកោណ ដំណាក់កាលទី១។

ជាមួយគ្នានេះ ឯកឧត្តមរដ្ឋលេខាធិការបានបញ្ជាក់បន្ថែមថា កិច្ចការបន្ទាប់ គឺនៅពេលសេចក្តីព្រាងឯកសារនានាសម្រាប់ការតាមដាន ការត្រួតពិនិត្យ និងការវាយតម្លៃលើការអនុវត្តផែនការយុទ្ធសាស្ត្របញ្ចកោណ ដំណាក់កាលទី១ ត្រូវបានបញ្ចប់ និងអនុម័តដោយរាជរដ្ឋាភិបាល លេខាធិការដ្ឋាន ក.យ.ផ.គ.ធទឧ នឹងសហការជាមួយនាយកដ្ឋានផែនការ និងសហប្រតិបត្តិការអន្តរជាតិ ដើម្បីបន្តផ្សព្វផ្សាយដល់បណ្ដានាយកដ្ឋានក្រោមឱវាទក្រសួងទាំងអស់ ដើម្បីចូលរួមសហការអនុវត្ត៕