រដ្ឋមន្រ្តីបរិស្ថាន សម្តែងនូវការដឹងគុណ និងអរគុណចំពោះមន្រ្តីឧទ្យានុរក្សគ្រប់រូប ដែលបានលះបង់ខ្ពស់ដើម្បីបុព្វហេតុបរិស្ថាន និងធនធានធម្មជាតិ

ភ្នំពេញ៖ ការដឹងគុណ និងអរគុណចំពោះមន្ត្រីឧទ្យានុរក្ស(Rangers)របស់រដ្ឋមន្រ្តីក្រសួងបរិស្ថាន បានថ្លែងឡើងនៅក្នុងពិធីសំណេះសំណាល និងចុះសួរសុខទុក្ខមន្រ្តីរាជការ មន្រ្តីឧទ្យានុរក្ស(Rangers) នៃមន្ទីរបរិស្ថានខេត្តមណ្ឌលគីរី នៅថ្ងៃទី៣១ ខែកក្កដា ឆ្នាំ២០២៤។

ជាមួយគ្នានេះ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ក៏បានទទួលទានអាហារសាមគ្គីជាមួយមន្រ្តីរាជការ និងមន្រ្តីឧទ្យានុរក្ស(Rangers) ដើម្បីចូលរួមអបអរខួបលើកទី១៧ នៃទិវាឧទ្យានុរក្សពិភពលោកផង និងជំរុញលើកទឹកចិត្តដល់ក្រុមគ្រួសារបរិស្ថាន ឱ្យពន្លឿនល្បឿននាវាបរិស្ថាន ឆ្ពោះទៅសម្រេចបានគោលដៅយុទ្ធសាស្រ្តបញ្ចកោណដំណាក់កាលទី១របស់រាជរដ្ឋាភិបាលកម្ពុជានីតិកាលទី៧។

សូមជម្រាបជូនថា ប្រទេសកម្ពុជាបានប្រារព្ធទិវាឧទ្យានុរក្សប្រចាំឆ្នាំលើកដំបូងនៅឆ្នាំ២០១៧ ដោយមានការចូលរួមពីស្ថាប័នពាក់ព័ន្ធអង្គការជាតិ និងអន្តរជាតិ ព្រះសង្ឃ និស្សិតសហគមន៍មូលដ្ឋាន សាធារណជនទូទៅ និងវិស័យឯកជន។ ការប្រារព្ធពិធីនេះ គឺដើម្បីលើកកម្ពស់ការយល់ដឹងជាសាធារណៈអំពីតួនាទីរបស់ឧទ្យានុរក្សនៅកម្ពុជា និងជំរុញឱ្យសាធារណជនចូលរួមចំណែក ជាមួយឧទ្យានុរក្សក្នុងការការពារ គ្រប់គ្រង អភិរក្សធនធានធម្មជាតិ និងបរិស្ថានប្រកបដោយចីរភាព ៕