ឯកឧត្តមរដ្ឋមន្ត្រី ថោ ជេដ្ឋា ចុះពិនិត្យស្ថានភាពរំដោះទឹក និងពង្វាងទឹកនៅតាមបណ្តាព្រែក និងប្រឡាយក្នុងភូមិសាស្ត្រខេត្តកណ្តាល និងខេត្តតាកែវ

ភ្នំពេញ៖ នៅរសៀលថ្ងៃព្រហស្បតិ៍ ១២រោច ខែអាសាឍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១ ខែសីហា ឆ្នាំ២០២៤ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អមដំណើរដោយឯកឧត្តមរដ្ឋលេខាធិការប្រចាំការ រដ្ឋលេខាធិការ អនុរដ្ឋលេខាធិការ អគ្គនាយក លោកអគ្គនាយករង ប្រធាននាយកដ្ឋានពាក់ព័ន្ធ មន្ត្រីបច្ចេកទេសក្រសួង និងមន្ទីរធនធានទឹក និងឧតុនិយមរាជធានីភ្នំពេញ និងខេត្តកណ្តាល បានអញ្ជើញចុះពិនិត្យស្ថានភាពរំដោះទឹក ពង្វាងទឹកនៅតាមព្រែក ប្រឡាយមួយចំនួនក្នុងភូមិសាស្ត្រក្រុងតាខ្មៅ និងស្រុកកណ្តាលស្ទឹង ខេត្តកណ្តាល និងស្រុកបាទី ខេត្តតាកែវ។

ក្នុងឱកាសនោះ ឯកឧត្តមរដ្ឋមន្ត្រី និងក្រុមការងារបានអញ្ជើញចុះពិនិត្យស្ថានភាពកាយប្រឡាយពង្វាងទឹកពីព្រែករទាំងតាមប្រឡាយ៩០ តំបន់អាកាសយានដ្ឋានអន្តរជាតិតេជោ ដើម្បីនាំទឹកទៅបឹងជើងលោង ក្នុងភូមិសាស្ត្រខេត្តកណ្តាល និងពិនិត្យស្ថានភាពទឹកតាមប្រឡាយពង្វាងទឹកពីប្រឡាយ៧៨ ហូរទៅកាន់ទន្លេបាទី និងប្រឡាយហនុមាន ក្នុងខេត្តតាកែវ។

សូមជម្រាបថា កាលពីប៉ុន្មានថ្ងៃកន្លងទៅនេះ ដើម្បីបញ្ចៀសការជន់លិចក្នុងភូមិសាស្ត្រក្រុងតាខ្មៅ និងស្រុកកណ្ដាលស្ទឹង ឯកឧត្តមរដ្ឋមន្ត្រី ដោយមានការឯកភាពពីអាជ្ញាធរខេត្តកណ្តាលបានបញ្ជាឱ្យកាត់ផ្តាច់ទំនប់ត្រង់ប្រឡាយ៩៤ និងកាយផ្តាច់បើកមុខទឹកនៅទំនប់៥៤ ស្ថិតក្នុងស្រុកស្អាង ខេត្តកណ្តាល ក្បែរអាកាសយានដ្ឋានថ្មី ចំនួន ៣ទីតាំង ដើម្បីជួយរំដោះទឹកជាបណ្តោះអាសន្ន ពីតំបន់ដែលរងការគំរាមកំហែង និងជន់លិច។

សូមបញ្ជាក់ថា ក្នុងរយៈពេលប៉ុន្មានសប្តាហ៍ចុងក្រោយនេះ ឥទ្ធិពលព្យុះ និងប្រព័ន្ធវិសម្ពាធទាបបានបង្កឱ្យមានភ្លៀងធ្លាក់ជាបន្តបន្ទាប់ស្ទើរតែនៅគ្រប់តំបន់ក្នុងព្រះរាជាណាចក្រកម្ពុជា និងបានបណ្តាលឱ្យទឹកទន្លេមេគង្គ និងស្ទឹងសំខាន់ៗមានការកើនឡើងជាបន្តបន្ទាប់ ព្រមទាំងបង្កជាជំនន់ទឹកភ្លៀងនៅតាមតំបន់មួយចំនួនផងដែរ ៕