កងពលតូចអន្តរាគមន៍លេខ១៤ ប្រារព្ធពិធីបិទវគ្គហ្វឹកហ្វឺនបំប៉ន ពង្រឹងរវសេនាតូចលេខ១៤២

ភ្នំពេញ៖ នៅថ្ងៃទី២ ខែសីហា ឆ្នាំ២០២៤ កងពលតូចអន្តរាគមន៍លេខ១៤ បានរៀបចំពិធីបិទវគ្គហ្វឹកហ្វឺនបំប៉នពង្រឹងវរសេនាតូចលេខ១៤២ ចំណុះឱ្យកងពលតូចអន្តរាគមន៍លេខ១៤ ក្រោមអធិបតីភព ឯកឧត្តម ឧត្តមសេនីយ៍ទោ គឹម សេងងន មេបញ្ជាការ កងពលតូចអន្តរាគមន៍លេខ១៤ ទាំងមានការអញ្ជើញចូលរួមពី លោកមេបញ្ជាការ មេបញ្ជាការរង នាយទាហាន នាយទាហានរង ពលទាហាន ទូទាំងកងពលតូចអន្តរាគមន៍លេខ១៤ ។

ឯកឧត្តម មេបញ្ជាការកងពល បានឱ្យដឹងថា អនុវត្តតាមផែនការរបស់កងទ័ពជើងគោក ស្តីពីការងារ ហ្វឹកហ្វឺនឆ្នាំ២០២៤ អង្គភាពបាន ដំណើរការបើកវគ្គហ្វឹកហ្វឺនបំប៉នពង្រឹងវរសេនាតូចលេខ១៤២ កងឯកភាព ឆ្នាំ២០២៤ ទៅតាមផែនការដែលបាន កំណត់។
ក្នុងឆ្នាំ២០២៤ នេះកងពលតូចអន្តរាគមន៍លេខ១៤ បានរៀបចំបើកវគ្គហ្វឹកហ្វឺនបំប៉នពង្រឹងវរសេនាតូចលេខ១៤២ ចំនួន ០១វគ្គ មានសិក្ខាកាម មកពីបណ្តាកងឯកភាពចំណុះសរុបចំនួន១០០ នាក់ និងគ្រូចំនួន០៧នាក់ រយៈពេលហ្វឹកហ្វឺន៩១ថ្ងៃ គិតចាប់ពីថ្ងៃទី០១ ខែឧសភា ឆ្នាំ២០២៤ ដល់ថ្ងៃទី០២ ខែសីហា ឆ្នាំ២០២៤ ។ ឆ្លងកាត់ការប្រឡងបញ្ចប់វគ្គ អង្គភាពពិនិត្យឃើញថា សិក្ខាកាមភាគច្រើនទទួលចំណាត់ ថ្នាក់និទ្ទេសល្អ និងល្អបង្គួរ ដែលអាចវាយតម្លៃបានថាវគ្គហ្វឹកហ្វឺនបំប៉នពង្រឹងវរសេនាតូចលេខ១៤១ ២០២៤ បានបញ្ចប់ទៅប្រកបដោយជោគជ័យ និងទទួលបានលទ្ធផលល្អគួរជាទីមោទនៈ។

ឯកឧត្តម ឧត្តមសេនីយ៍ទោ គឹម សេងងន មេបញ្ជាការកងពលតូចអន្តរាគមន៍លេខ១៤ បានធ្វើការផ្តាំផ្ញើដល់ សិក្ខាកាមទាំងអស់ថា ត្រូវគោរពឱ្យបាននូវវិន័យ អត្តចរិត សីលធម៌រស់នៅស្អាតស្អំ ឲ្យសមស្របទៅជាកងយោធពលខេមរភូមិន្ទ និងត្រូវត្រៀមខ្លួនជានិច្ចក្នុងការអនុវត្តភារកិច្ចតាមផែនការដែលថ្នាក់លើបានកំណត់ នឹងត្រូវចូលរួមទប់ស្កាត់ឲ្យបាននូវរាល់ចលនាផ្សេងៗរបស់ពួកប្រឆាំងនិងអមិត្ត ដែលប៉ុនប៉ងផ្តួលរំលំរដ្ឋាភិបាលស្របច្បាប់។

ឯកឧត្តមបន្តថា ការងារហ្វឹកហ្វឺន គឺជាការងារមួយសំខាន់ និងចាំបាច់បំផុត ក្នុងការបំពេញភារកិច្ចជំនាញ។ សិក្ខាកាមត្រូវប្រែក្លាយចំណេះដឹងដែលបាន ហ្វឹកហ្វឺនខិតខំរៀនសូត្រ អោយទៅជាសកម្មភាពជាក់ស្ដែង ដែលមានសមត្ថភាពគ្រប់គ្រាន់ ដើម្បីបំពេញភារកិច្ចឱ្យទទួលបានជោគជ័យ។

ឯកឧត្តម ក៏បានផ្តាំផ្ញើដល់ប្អូនៗ ដែលទើបបញ្ចប់ការហ្វឹកហ្វឺន ត្រូវយកចិត្តទុកដាក់ ខិតខំតស៊ូ អនុវត្តឲ្យបានល្អ និងត្រូវព្យាយាមប្រឹងប្រែងហាត់ពត់លុតដំខ្លួន តស៊ូព្យាយាមបំពេញការងារឲ្យកាន់តែល្អថែមទៀត ពិសេសក្រោយពីបញ្ចប់វគ្គហ្វឹកហ្វឺន វិលទៅបំពេញការងារតាមអង្គភាពខ្លួនវិញ ត្រូវខិតខំបំពេញការងារឲ្យកាន់តែល្អថែមទៀត ពិសេសត្រូវខិតខំសិក្សាស្រាវជ្រាវបន្ថែមលើគ្រប់ជំនាញ ដើម្បីបន្តជួយបង្ហាត់បង្រៀនដល់នាយទាហាននៅក្នុងអង្គភាពរបស់ខ្លួន ឱ្យមានសមត្ថភាព ក្នុងការបំពេញភារកិច្ចជូនប្រទេសជាតិ៕