មន្រ្តីជាន់ខ្ពស់ក្រសួងធនធានទឹក ចុះពិនិត្យស្ថានភាពទឹកស្ទឹងព្រែកត្នោត ក្នុងភូមិសាស្ដ្រខេត្តកណ្ដាល និងរាជធានីភ្នំពេញ

ភ្នំពេញ៖ នៅថ្ងៃអាទិត្យ ១៥រោច ខែអាសាឍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៤ ខែសីហា ឆ្នាំ២០២៤នេះ ឯកឧត្តម ចាន់ ស៊ីណាត រដ្ឋលេខាធិការ ក្រសួងធនធានទឹក និងឧតុនិយម បានដឹកនាំមន្ដ្រីជំនាញ អមដំណើរដោយប្រធានមន្ទីរធនធានទឹក និងឧតុនិយមខេត្តកណ្ដាល និងរាជធានីភ្នំពេញ ចុះពិនិត្យជាក់ស្ដែងពីស្ថានភាពទឹកស្ទឹងព្រែកត្នោត ស្ថិតក្នុងភូមិសាស្ដ្រខេត្តកណ្ដាល និងរាជធានីភ្នំពេញ។

ឯកឧត្តមរដ្ឋលេខាធិការ បានបញ្ជាក់ថា ការចុះពិនិត្យជាក់ស្ដែងលើស្ថានភាពទឹកស្ទឹងព្រែកត្នោតត្រង់ភូមិសាស្ដ្រទាំងអស់ ក្នុងស្រុកកណ្ដាលស្ទឹង ខេត្តកណ្ដាល និងខណ្ឌដង្កោ រាជធានីភ្នំពេញ ជាពិសេស នៅត្រង់តំបន់វត្តចំការខ្សាច់។

ឯកឧត្តមរដ្ឋលេខាធិការ បានបន្ថែមទៀតថា បន្ទាប់ពីចុះពិនិត្យពីស្ថានភាពទឹកស្ទឹងព្រែកត្នោត នឹងជំរុញវិធានការ និងពង្រឹងការដាក់យុទ្ធសាស្រ្តអនុវត្តន៍ នាពេលដ៏ខ្លីខាងមុខឱ្យបានទាន់រដូវវស្សានេះ ៕