ប្រមុខរាជរដ្ឋាភិបាល៖ សំណង់ព្រែកជីកហ្វូណនតេជោ យកលំនាំតាមចក្ខុវិស័យរបស់ដូនតាខ្មែរ នាសម័យអាណាចក្រហ្វូណន
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា សំណង់ព្រែកជីកហ្វូណនតេជោ យកលំនាំតាមចក្ខុវិស័យរបស់ដូនតាខ្មែរយើង នាសម័យអាណាចក្រហ្វូណន កាលពី ២០០០ឆ្នាំមុន ។
ក្នុងពិធីបើកការដ្ឋានព្រែកជីកហ្វូណនតេជោ នាថ្ងៃទី៥ ខែសីហា ឆ្នាំ២០២៤ សម្ដេចធិបតី ហ៊ុន ម៉ាណែត បានថ្លែងបញ្ជាក់ថា នៅក្នុងណាចក្រហ្វូណន ដែលមាននៅក្នុងឯកសារនោះ រាជធានីនៅក្នុងស្រុកអង្គរបុរី ដែលពេលនោះខ្មែរយើងមានទី១ គឺកសិកម្ម ដោយសារនៅអង្គរបុរីមានប្រព័ន្ធធារាសាស្ត្រច្រើនដែលបម្រើឱ្យផ្នែកកសិកម្ម ដែលជាហេតុធ្វើឱ្យសេដ្ឋកិច្ចរបស់កម្ពុជានៅពេលនោះរឹងមាំ ហើយលើសពីនេះទៀតគឺការធ្វើពាណិជ្ជកម្មអន្តរជាតិផងដែរ។
សម្តេចធិបតីនាយករដ្ឋមន្រ្ដីបានគូសបញ្ជាក់ថា តាមការស្រាវជ្រាវនៅអង្គរបុរីមានព្រែកជីកចំនួន៥ ដែលបម្រើឱ្យ ការតភ្ជាប់ផ្នែកពាណិជ្ជកម្មក្នុងនោះមានព្រែកជីកមួយធំហៅថាព្រែកទី៥ មានប្រវែង៩០គីឡូម៉ែត្រ ដែលភ្ជាប់អង្គរបុរី ជាមួយនឹងកំពង់ផែអូកែវ (កំពង់ផែអន្តរជាតិ) ។
សម្ដេចធិបតីបន្ដថា «អីចឹង២០០០ឆ្នាំក្រោយមក ដល់ថ្ងៃនេះកូនចៅបានបើក នូវការដ្ឋានសាងសង់ព្រែកជីក យកលំនាំចក្ខុវិស័យ របស់បុព្វបុរសរបស់យើង ។ កសាងព្រែ កជីកដែលភ្ជាប់ភ្នំពេញ ជាមួយកំពង់ផែទឹកជ្រៅរបស់យើង នៅខេត្តព្រះសីហនុ និងខេត្តកំពត»។
សម្តេចធិបតី ហ៊ុន ម៉ាណែត បានគូសបញ្ជាក់ថា ការសាងសង់ព្រែកជីកនេះបានភ្ជាប់ទំនាក់ទំនងផ្នែកពាណិជ្ជកម្មជាមួយពិភពលោកផងដែរ ហើយការសាងសង់ព្រែកជីកនេះគឺជាការតភ្ជាប់ពីផ្នែកផ្លូវទឹកត្រង់ទៅដល់ផែអន្តរជាតិ ដែលធ្វើតាមលំនាំសម័យអាណាចក្រភ្នំ ឬអាណាចក្រហ្វូណន៕
