តំបន់ប្រតិបត្តិការសឹករងកំពង់ឆ្នាំង ប្រារព្ធពិធីអបអរសាទរពិធីបើកការដ្ឋានសាងសង់ព្រែកជីកហ្វូណនតេជោ
ភ្នំពេញ៖ នាថ្ងៃចន្ទ ទី៥ ខែសីហា ឆ្នាំ២០២៤ នៅទីបញ្ជាការ តំបន់ប្រតិបត្តិការសឹករងកំពង់ឆ្នាំង បានរៀបចំអបអរសាទរពិធីបើកការដ្ឋានសាងសង់ព្រែកជីកហ្វូណនតេជោ ដែលពិធីនេះស្ថិតក្រោមអធិបតីភាព ឯកឧត្តម ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង ដោយមានការចូលរួមពី លោកមេបញ្ជាការរង លោកនាយសេនាធិការរង ព្រមទាំង នាយទាហាន នាយទាហានរង និងពលទាហាន យ៉ាងច្រើនកុះករនៅក្នុងទីបញ្ជាការ ព្រមជាមួយគ្នានេះ នៅគ្រប់បណ្តាកងកភាពចំណុះ ក៏មានរៀបចំកម្មវិធីនេះដូចៗគ្នា ដោយមានការវាយជួង ទូងស្គរ វាយរគាំង គ្រវីទង់ជាតិ ទង់សាសនា និង ទង់ព្រះមហាក្សត្រ ដើម្បីញាំងឲ្យពិធីដ៏មានសារ:សំខាន់ជាប្រវត្តិសាស្ត្រនេះមានភាពអធិកអធម និងមហោឡារិក ។
ឯកឧត្តម មេបញ្ជាការ បានលើកឡើងបន្ថែមទៀតថា ការសាងសង់ព្រែកជីកហ្វូណនតេជោនេះ បានផ្តល់ផលប្រយោជន៍ដ៏ធំធេងមហិមា សម្រាប់ការអភិវឌ្ឍន៍ប្រទេសជាតិ និងផលប្រយោជន៍របស់ប្រជាជនកម្ពុជាទាំងមូល ពិសេសជាសមិទ្ឋផលថ្មីមួយទៀតក្រោមការដឹកនាំដោយរាជរដ្ឋាភិបាលនៃអាណត្តិទី៧ របស់សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា សម្រាប់កូនចៅយើង នៅជំនាន់ក្រោយៗរាប់ពាន់ឆ្នាំតទៅមុខទៀត ។
នៅក្នុងឱកាសជាប្រវត្តិសាស្ត្រនេះ តំណាងឱ្យនាយទាហាន នាយទាហានរង និងពលទាហាន ទូទាំងតំបន់ប្រតិបត្តិការសឹករងកំពង់ឆ្នាំង ឯកឧត្តម ឧត្តមសេនីយ៍ត្រី អ៊ុំ សុភា បានប្រកាសជាឱឡារិក គាំទ្រយ៉ាងពេញទំហឹង នូវពិធីបើកការដ្ឋានសាងសង់ព្រែកជីកហ្វូណនតេជោនេះ ឲ្យទទួលបានជោគជ័យ ដើម្បីផលប្រយោជន៍ប្រទេសជាតិ និងប្រជាជនកម្ពុជា ៕
