លោកជំទាវ អ៊ាត សោភា បើកវគ្គបណ្តុះបណ្តាលជំនាញបច្ចេកទេស គណនេយ្យក្រៅប្រទេស សម្រាប់គណនេយ្យករ ២១រូប ដែលទទួលការតែងតាំង ឲ្យទៅបំពេញភារកិច្ចតាមស្ថានតំណាងកម្ពុជាប្រចាំនៅក្រៅប្រទេស
ភ្នំពេញ៖ នៅថ្ងៃទី៦ ខែសីហា ឆ្នាំ២០២៤ នៅវិទ្យាស្ថានជាតិការទូត និងទំនាក់ទំនងអន្តរជាតិលោកជំទាវ អ៊ាត សោភា រដ្ឋលេខាធិការ និងជាទីប្រឹក្សាផ្ទាល់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងជាតំណាងរបស់ឯកឧត្តម សុខ ចិន្តាសោភា ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ បានអញ្ជើញជាអធិបតីថ្លែងក្នុងពិធីបើកវគ្គបណ្តុះបណ្តាលស្តីពី «ជំនាញបច្ចេកទេស គណនេយ្យក្រៅប្រទេស សម្រាប់គណនេយ្យករចំនួន២១រូប ដែលត្រូវទទួលបានការតែងតាំងឲ្យទៅបំពេញភារកិច្ចតាមស្ថានតំណាងកម្ពុជាប្រចាំនៅក្រៅប្រទេស។
លោកជំទាវរដ្ឋលេខាធិការ បានណែនាំដល់សិក្ខាកាមទាំងអស់ត្រូវយកចិត្តទុកដាក់ចំពោះការសិក្សា ព្រោះតួនាទីរបស់គណនេយ្យករមានសារៈសំខាន់ណាស់ ក្នុងការរៀបចំផែនការថវិកា និងគាំទ្រដំណើរការជាប្រចាំថ្ងៃរបស់ស្ថានបេសកកម្ម។ គណនេយ្យករត្រូវគ្រប់គ្រងចំណូល-ចំណាយ រក្សាទុកដាក់ និងគ្រប់គ្រងសាច់ប្រាក់ កាន់បញ្ជីគណនេយ្យ គ្រប់គ្រងទ្រព្យសម្បត្តិរដ្ឋ ។ល។ លើសពីនេះ គណនេយ្យករត្រូវជួយប្រធានស្ថានបេសកកម្ម ក្នុងការរៀបចំផែនការសកម្មភាពរបស់ស្ថានបេសកកម្ម ឱ្យចំទិសដៅស្របតាមគោលនយោបាយការបរទេសរបស់រាជរដ្ឋាភិបាលកម្ពុជា ៕
