សម្តេចក្រឡាហោម ស ខេង ទទួលជួបសម្តែងការគួរសម និងពិភាក្សាការងារជាមួយ ឯកអគ្គរដ្ឋទូតចិនប្រចាំកម្ពុជា
ភ្នំពេញ៖ នារសៀលថ្ងៃទី៦ ខែសីហា ឆ្នាំ២០២៤នេះ សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាតំណាងរាស្ត្រនៅមណ្ឌលខេត្តបាត់ដំបង បានទទួលជួបសម្តែងការគួរសម និងពិភាក្សាការងារជាមួយ ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា និងសហការី នៅវិមានរដ្ឋសភា។
ជាកិច្ចចាប់ផ្ដើមសម្តេចក្រឡាហោម ស ខេង បានសម្តែងនូវការស្វាគមន៍យ៉ាងកក់ក្តៅ សម្ដេចក៏សូមចូលរួមដង្ហែតាមអង្គព្រះមហាក្សត្រព្រះករុណាជាអម្ចាស់ជីវិតតម្កល់លើត្បូងចូលរួមអបអរសាទរចំពោះឯកឧត្តម វ៉ាង វិនពីន ដែលត្រូវបាន តែងតាំងជាឯកអគ្គរដ្ឋទូតវិសាមញ្ញនិងពេញសមត្ថភាពរបស់សាធារណរដ្ឋប្រជាមានិតចិន ប្រចាំនៅរាជាណាចក្រកម្ពុជា។
សម្តេចក្រឡាហោម ចាត់ទុកថាការតែងតាំងឯកឧត្ដម នៅក្នុងតួនាទីនេះគឺពិតជាបង្ហាញអំពី សារៈសំខាន់ ដែលសាធារណរដ្ឋប្រជាមានិតចិន បានមើលឃើញចំពោះទំនាក់ទំនងជាមួយនឹងព្រះរាជាណាចក្រកម្ពុជា។
ជាការឆ្លើយតបឯកឧត្តម ឯកអគ្គរដ្ឋទូត ចិន បានថ្លែងអំណរគុណសម្តេច និងសូមកោតសរសើរ និងវាយតម្លៃខ្ពស់ចំពោះសម្តេច ក្នុងនាមជាឥស្សរជននយោបាយជាន់ខ្ពស់មួយរូប ដែលបានចូលរួមចំណែកយ៉ាងច្រើននៅក្នុងដំណើរការស្ដារកសាងអភិវឌ្ឍន៍ និងប្រទេសកម្ពុជាដូចជារួមចំណែកដល់ការ ថែរក្សានូវសុខសន្តិភាពនិងស្ថិរភាព។
ឯកឧត្តម វ៉ាង វិនពីន មានប្រសាសន៍ បន្តថា កន្លងមកសម្ដេចក្រឡាហោម ក៏ជាមិត្តភក្ដិចាស់របស់ប្រទេសចិន នៅក្នុងតួនាទីសម្តេច បានបំពេញនៅក្នុងអាណត្តិមុនៗ កន្លងមក ជាឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
ឯកឧត្តម វ៉ាង វិនពីន មានប្រសាសន៍ បន្ថែមថា កិច្ចសហប្រតិបត្តិការនិងទំនាក់ទំនងរវាងប្រទេសទាំងពីរ កម្ពុជា-ចិន គឺត្រូវបានបង្កើតឡើង ចាប់ពីថ្នាក់ដឹកនាំជាច្រើនជំនាន់មុនរួចមកហើយ តាំងរហូតមកដល់ពេលនេះ ហើយមិត្តភាពរវាងប្រទេសទាំងពីរ នៅតែត្រូវបានបន្តពង្រឹងពង្រីកឥតឈប់ឈរ រហូតមកដល់ពេលនេះ ទំនាក់ទំនងមិត្តភាពក្លាយទៅជាមិត្តភាពដែកថែបបន្តមកដល់ជំនាន់ក្រោយ ។
ឯកឧត្តម វ៉ាង វិនពីន ក៏សង្ឃឹមជឿជាក់ថាទោះបីជាសម្តេចក្រឡាហោម ទោះមិនស្ថិតនៅក្នុងរដ្ឋាភិបាល ក៏ប៉ុន្តែឧត្ដមសង្ឃឹមជឿជាក់ថាសម្ដេច នៅតែបន្តគាំទ្រនិងយកចិត្តទុកដាក់ដល់ការពង្រឹងពង្រីកនូវទំនាក់ទំនងរវាងប្រទេសទាំងពីរ ។
ជាការឆ្លើយតបសម្ដេចក្រឡាហោម សូមថ្លែងអំណរគុណចំពោះពាក្យពេចន៍ដ៏ល្អដែលឯកឧត្តម បានលើកឡើង ហើយសម្ដេច ក៏សូមថ្លែងអំណរគុណចំពោះបក្សក៏ដូចជារដ្ឋាភិបាលចិន ដែលកន្លងមកតែងជួយគាំទ្រដល់បុព្វហេតុ ស្ដារ និងអភិវឌ្ឍប្រទេសកម្ពុជា ក៏ដូចជារួមចំណែកដល់ការធានាដល់សុខសន្តិភាពនិងស្ថិរភាពរបស់កម្ពុជា ។
សម្តេចក្រឡាហោម ក៏សូមកោតសរសើរនិងវាយតម្លៃខ្ពស់ចំពោះការអភិវឌ្ឍរីកចម្រើនរបស់ប្រទេសចិន ក្រោមការដឹកនាំរបស់គណបក្សក៏ដូចជារបស់រដ្ឋាភិបាល ហើយសម្ដេចក៏សូមវាយតម្លៃខ្ពស់ចំពោះតួនាទីកាន់តែមានសារៈសំខាន់របស់ប្រទេសចិននៅក្នុង ឆាកអន្តរជាតិ ជាពិសេសនៅក្នុងក្របខណ្ឌសកលដែលប្រទេសចិនបានដើរតួនាទីកាន់តែសំខាន់នៅក្នុង ការងារនយោបាយក៏ដូចជាសេដ្ឋកិច្ច។
សម្តេចក្រឡាហោម ផ្ទាល់នឹងបន្តខិតខំអស់ពីលទ្ធភាពនិងគ្រប់លទ្ធភាពក្នុងការបន្តគាំទ្រដូចជាពង្រឹងពង្រីកនូវទំនាក់ទំនងនិងកិច្ចសហប្រតិបត្តិការរវាងប្រទេសទាំងពីរ។
ជាចុងបញ្ចប់ សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាតំណាងរាស្ត្រនៅមណ្ឌលខេត្តបាត់ដំបង សូមជូនពរឲ្យឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា និងសហការី សូមទទួលបានជោគជ័យនៅក្នុងបេសកកម្មអាណត្តិការទូត របស់ឧត្ដមនៅព្រះរាជាណាចក្រកម្ពុជា៕
