អាជ្ញាធរខេត្តស្ទឹងត្រែង ព្រមានអ្នកកាប់ទន្ទ្រានដីព្រៃ និងអ្នកនៅពីក្រោយបទល្មើស យកមកអនុវត្តតាមច្បាប់
ភ្នំពេញ៖ ឯកឧត្តម សរ សុពុត្រា អភិបាល នៃគណៈអភិបាលខេត្តស្ទឹងត្រែង បានព្រមានអ្នកដែលកាប់ទន្ទ្រានដីព្រៃ និងអ្នកបក្ខពួកបញ្ជានៅពីក្រោយ ដែលជួលប្រជាជនធ្វើជាខែល ជារនាំងបិទបាំង ហើយបក្ខពួកខ្លួនចាំទទួលផល ត្រូវតែតាមចាប់យកមកអនុវត្តទោសតាមច្បាប់មិនលើកលែងឡើយ។ ការព្រមានបែបនេះ ធ្វើឡើងក្នុងសន្និសីទសារព័ត៌មានមួយក្នុងមន្ទីរបរិស្ថានខេត្តស្ទឹងត្រែង នៅរសៀលថ្ងៃទី៦ ខែសីហា ឆ្នាំ២០២៤។
ឯកឧត្តម សរ សុពុត្រា បានលើកឡើងថា ខ្ញុំសូមផ្ញើសារចេញពីមន្ទីរបរិស្ថានខេត្តស្ទឹងត្រែង ជូនចំពោះប្រជាពលរដ្ឋ ដែលទៅលួចកាប់ទន្ទ្រានដីព្រៃយកមកធ្វើជាកម្មសិទ្ធិគ្រប់រូបភាព ក្រោមរូបភាពអត់ដីលំនៅឋាន ក្រោមរូបភាពអត់ដីស្រែ ចម្ការ ជាដើម ត្រូវបញ្ឃប់សកម្មភាពបែបនេះជាបន្ទាន់ ហើយសូមងាកមករកមុខរបរទទួលទានស្របច្បាប់ តាមសមត្ថភាពដែលខ្លួនមានវិញទើបប្រសើបំផុត ហើយមិនមានទោសកំហុសជាប់ខ្លួនថែមទៀត។
ឯកឧត្តម សរ សុពុត្រា បានបន្ថែមថា មិនត្រឹមតែប៉ុណ្ណោះទេ ចំពោះកម្មករសុីឈ្នូលកាប់ព្រៃឲ្យគេវាជាកំហុសមួយ តែកំហុសដែលធំជាងនេះទៀត គឺពួកជនអ្នកនៅពីក្រោយខ្នង ដែលជួលឲ្យប្រជាជនទាំងនោះ ទៅកាប់បំផ្លាញព្រៃឈើយកដី ហើយក្រោយមកដីនោះក្លាយទៅជាដើមចន្ទី ដើមកៅស៊ូជាដើម ក៏ត្រូវឲ្យស្ថាប័នសមត្ថកិច្ច និងស្ថាប័នតុលាការ បន្តស្រាវជ្រាវតាមចាប់ពួកបំផ្លាញព្រៃឈើទាំងនោះ យកមកអនុវត្តច្បាប់។ ការណ៍នេះដើម្បីអនុវត្ត និងគាំទ្រតាមបទបញ្ជាដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី គឺត្រូវហាមឃាត់ និងទប់ស្កាត់ដាច់ខាតរាល់ការកាប់ទន្ទ្រានដីព្រៃគ្រប់រូបភាពយកមកធ្វើជាកម្មសិទ្ធ តាមអំណាចមហិច្ចតារបស់ជនខិលខូចទាំងនោះ។
ក្នុងឱកាសនោះ លោក ស្រេង ជាហេង ប្រធានមន្ទីរបរិស្ថានខេត្តស្ទឹងត្រែង បានបង្ហាញភស្តុតាងនូវវត្ថុតាងជាច្រើនប្រភេទដែលមន្ត្រីបរិស្ថានធ្វើការរឹបអូសពីក្រុមជនខិលខូច ដូចជា អាវុធពិត អាវុធកែច្នៃ ម៉ាសុីនត្រង់សុីនើ ខ្សែអន្ទាក់ និងឈើអារជាច្រើនម៉ែត្រគូបផងដែរ។
សូមបញ្ជាក់ថា កាលពីពេលប៉ុន្មានខែកន្លងទៅនេះ ខេត្តស្ទឹងត្រែង បានរំដោះដីយកមកប្រគល់ជូនរដ្ឋវិញ បានជិត ២មុឺនហិកតា ដែលដឹកនាំបង្ក្រាបដោយ ឯកឧត្តម ប៉ាន់ ខែមប៊ុនថន ប្រធានក្រុមការងារពិសេស និងជានាយយករងខុទ្ទកាល័យសម្តេចមហាបវរធិបតី ហ៊ុន ម៉ាណែត ៕
