ឯកឧត្តម មាន ចាន់យ៉ាដា៖ វីរៈភាពរបស់បងប្អូនកងកម្លាំងឈរជើងការពារតាមព្រំដែន គឺជាសេចក្តីសុខ និងភាពកក់ក្តៅរបស់ពលរដ្ឋទូទាំងប្រទេស
ភ្នំពេញ៖ នាថ្ងៃទី១០ ខែសីហា ឆ្នាំ២០២៤ ឯកឧត្តម មាន ចាន់យ៉ាដា អភិបាល នៃគណៈអភិបាលខេត្តឧត្តរមានជ័យ បាន អញ្ជើញចុះសួរសុខទុក្ខកងកម្លាំងឈរការពារតាមព្រំដែន នៃកងការពារព្រំដែនគោកលេខ៤០៣ និងប៉ុស្តិ៍នគរបាលការពារព្រំដែនគោក តាមបណ្ដោយព្រំដែនក្នុងភូមិសាស្ត្រស្រុកអន្លង់វែង ខេត្តឧត្តរមានជ័យ ដោយមានការចូលរួមពីឯកឧត្តមអស់លោកមេបញ្ជាការកងពល មេបញ្ជាការទិស និងមេបញ្ជាការកងការពារផងដែរ។
ក្នុងឱកាសនោះ ឯកឧត្តម មាន ចាន់យ៉ាដា អភិបាលខេត្តឧត្តរមានជ័យ បានមានប្រសាសន៍ថា ថ្ងៃនេះឯកឧត្តមពិតជាមានសេចក្តីសោមនស្សរីករាយក្រៃលែង ដែលបងៗមេបញ្ជាការទាំងអស់ស្រុះដៃគ្នាចូលរួមជាមួយរដ្ឋបាលខេត្តឧត្តរមានជ័យ ដោះស្រាយបញ្ហាចាំបាច់ជាក់ស្តែងដូចខាងក្រោម៖
-ពង្រីកចិញ្ចើមផ្លូវចាក់គ្រួសក្រហមទទឹង ១ម៉ែត្រ ប្រវែង ១៥០ម៉ែត្រ (ផ្លូវចពីច្រកទ្វារព្រំដែនអន្តរជាតិជាំ)។
-រៀបចំរបាំងបេតុងកម្ពស់ ១ម៉ែត្រ ប្រវែង ១៥០ម៉ែត្រ នៅចំណុចឧស្សាហ៍កើតមានគ្រោះថ្នាក់ចរាចរណ៍ (ចុះពីច្រកទ្វារព្រំដែនអន្តរជាតិជាំ)។
-សាងសង់ទំនប់បង្ហៀរទឹក សម្រាប់ទប់ទឹកប្រើប្រាស់របស់កងអនុសេនាធំគាំទ្រ នៃកងការពារព្រំដែនគោកលេខ៤០៣ លើភ្នំ២០០។
ជាមួយគ្នានោះ ឯកឧត្តមអភិបាលខេត្ត បានគូសបញ្ជាក់ថា វីរៈភាពរបស់បងប្អូនកងកម្លាំងឈរជើងការពារតាមព្រំដែន គឺជាសេចក្តីសុខ និងភាពកក់ក្តៅរបស់បងប្អូនប្រជាពលរដ្ឋទូទាំងប្រទេស ៕
