មេទ័ពជើងគោកហ្វីជី៖ វត្តមានរបស់ប្រតិភូកងទ័ពជើងគោកកម្ពុជា លើទឹកដីប្រទេសហ្វីជី ជាចំណុចចាប់ផ្តើមនៃទំនាក់ទំនងយោធា កម្ពុជា-ហ្វីជី

ភ្នំពេញ៖ នៅថ្ងៃទី១៣ ខែសីហា ឆ្នាំ២០២៤ ក្នុងឱកាសចូលរួមសិក្ខាសាលាគ្រប់គ្រងកងទ័ពជើងគោក នៃប្រទេសក្នុងតំបន់ឥណ្ឌូប៉ាស៊ីហ្វិក ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានជួបពិភាក្សាការងារ ជាមួយ ឯកឧត្តម ឧត្តមសេនីយ៍ត្រី ONISIVORO COVINISAQA មេបញ្ជាការកងទ័ពជើងគោកហ្វីជី។

ក្នុងជំនួបនេះ ឯកឧត្តម នាយឧត្តមសេនីយ៍ ម៉ៅ សុផាន់ បានវាយតម្លៃខ្ពស់ចំពោះការចូលរួមរបស់កងទ័ពហ្វីជី ក្នុងកិច្ចខិតខំប្រឹងប្រែងការរក្សាសន្តិភាព និងស្ថិរភាពក្នុងតំបន់ ហើយកងទ័ពជើងគោក នៃកងយោធពលខេមរភូមិន្ទ ត្រៀមខ្លួនជាស្រេចក្នុងកិច្ចសហការ ការចែករំលែកបទពិសោធន៍ ជាមួយកងទ័ពជើងគោកហ្វីជី ពាក់ព័ន្ធកិច្ចការរក្សាសន្តិភាព និងការសង្រ្គោះគ្រោះមហន្តរាយ។

ជាការឆ្លើយតប ឯកឧត្តម ឧត្តមសេនីយ៍ត្រី ONISIVORO COVINISAQA បានថ្លែងអំណរគុណដល់ ឯកឧត្តម នាយឧត្តមសេនីយ៍ ម៉ៅ សុផាន់ ដែលបានធ្វើដំណើពីចម្ងាយ ដើម្បីចូលរួមសិក្ខាសាលាគ្រប់គ្រងកងទ័ពជើងគោក នៃប្រទេសក្នុងតំបន់ឥណ្ឌូប៉ាស៊ីហ្វិក លើកទី៤៨ (48th IPAMS) នៅទីក្រុង NADI ប្រទេស FIJI ហើយវត្តមានរបស់ប្រតិភូកងទ័ពជើងគោកកម្ពុជា នៅលើទឹកដីនៃប្រទេសហ្វីជីនេះ គឺជាចំណុចចាប់ផ្តើមនៃទំនាក់ទំនងយោធា កម្ពុជា-ហ្វីជី។