សម្តេចធិបតី៖ រយៈពេល១ឆ្នាំមកនេះ រាជរដ្ឋាភិបាលអាចរក្សាបាននូវស្ថិរភាព សន្តិភាព និងសេចក្តីសុខជូនពលរដ្ឋទូទាំងប្រទេស

​

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា ខួប១ឆ្នាំរបស់រាជរដ្ឋាភិបាល គឺយើងអាចរក្សាបាននូវស្ថិរភាព សន្តិភាព និងសេចក្តីសុខជូនប្រជាពលរដ្ឋ ពោលគឺយើងអាចប្រារព្ធពិធីទទួលវត្ថុបុរាណបានយ៉ាងរលូន ព្រោះននៅទូទាំងប្រទេសមិនមានភ្លើងសង្រ្គាម មិនមានការបែកបាក់ ឬការកាប់ចាក់នៅតាមមូលដ្ឋាននោះទេ ហើយយើងរួមគ្នាទទួលនូវព្រលឹងបុព្វបុរសយើងដោយស្មារតីសាមគ្គីភាពក្រោមម្លប់នៃសុខសន្តិភាព។

សម្តេចធិបតី ហ៊ុន ម៉ាណែត បានថ្លែងបន្តថា សមិទ្ធផលថ្ងៃនេះក៏ឆ្លុះបញ្ចាំងឱ្យឃើញពីការប្តេជ្ញាចិត្តខ្ពស់របស់រាជរដ្ឋាភិបាល និងពីសារៈសំខាន់នៃកិច្ចសហប្រតិបត្តិការដ៏ល្អជាមួយបណ្តាប្រទេសនានា និងសហគមន៍អន្តរជាតិផងដែរ នៅក្នុងយុទ្ធនាការសកលដើម្បីប្រយុទ្ធប្រឆាំងនឹងអំពើចោរកម្ម ការចរាចរនិងការជួញដូរខុសច្បាប់នៃសម្បត្តិវប្បធម៌។

សម្តេចធិបតី ហ៊ុន ម៉ាណែត បានថ្លែងយ៉ាងដូច្នេះក្នុងឱកាសដែលសម្តេចអញ្ជើញទទួលវត្ថុបុរាណខ្មែរនៅវិមានសន្តិភាព នាព្រឹកថ្ងៃទី២២ ខែសីហា ឆ្នាំ២០២៤នេះ ៕