មីយ៉ាន់ម៉ា វាយតម្លៃខ្ពស់ចំពោះទំនាក់ទំនងជាមួយចិន

បរទេស៖ លោក Min Aung Hlaing ប្រធានក្រុមប្រឹក្សារដ្ឋបាលរដ្ឋនៃប្រទេសមីយ៉ាន់ម៉ា (SAC) បានឲ្យដឹងកាលពីថ្ងៃពុធថា មីយ៉ាន់ម៉ាវាយតម្លៃខ្ពស់ចំពោះទំនាក់ទំនងរបស់ខ្លួនជាមួយប្រទេសចិន ហើយបានប្តេជ្ញាចិត្តក្នុងការអភិវឌ្ឍកិច្ចសហប្រតិបត្តិការទ្វេភាគីលើវិស័យផ្សេងៗ ពង្រឹងប្រពៃណីមិត្តភាព និងផលប្រយោជន៍ប្រជាជនទាំងពីរ។

លោក Min Aung Hlaing ក្នុងពេលទទួលនៅក្រុង Nay Pyi Taw លិខិតបញ្ជាក់ដែលបង្ហាញដោយឯកអគ្គរដ្ឋទូតចិនថ្មីប្រចាំប្រទេសមីយ៉ាន់ម៉ា លោកស្រី Ma Jia បានកត់សម្គាល់ថា មីយ៉ាន់ម៉ា និងចិន គឺជាអ្នកផ្តួចផ្តើមគំនិតដំបូងនៃគោលការណ៍ទាំង៥ នៃការរួមរស់ដោយសន្តិភាព ហើយបានអនុវត្តកិច្ចសហប្រតិបត្តិការជាមិត្តភាពយ៉ាងខ្ជាប់ខ្ជួនស្របតាម គោលការណ៍។

លោក Min Aung Hlaing បានបន្ថែមថា មីយ៉ាន់ម៉ានឹងខិតខំប្រឹងប្រែងដើម្បីការពារសុវត្ថិភាពបុគ្គលិក និងគម្រោងរបស់ចិនក្នុងប្រទេសមីយ៉ាន់ម៉ា ការពារសន្តិសុខ និងស្ថិរភាពនៃព្រំដែនមីយ៉ាន់ម៉ា-ចិនប្រកបដោយប្រសិទ្ធភាព ហើយនឹងមិនអនុញ្ញាតឱ្យមានអាកប្បកិរិយាណាមួយដែលបំផ្លាញសន្តិសុខ និងផលប្រយោជន៍របស់ចិនឡើយ។

ចំណែកលោកស្រី Ma Jia បានបញ្ជាក់ថា ប្រទេសចិននឹងជំរុញយ៉ាងខ្ជាប់ខ្ជួននូវគោលនយោបាយមិត្តភាពរបស់ខ្លួនចំពោះមីយ៉ាន់ម៉ា ហើយស្វាគមន៍មីយ៉ាន់ម៉ាក្នុងការពង្រឹងទំនាក់ទំនងជាមួយប្រទេសចិន និងរួមគ្នាកសាងសហគមន៍ចិន-មីយ៉ាន់ម៉ា ជាមួយនឹងអនាគតរួមគ្នា។ លោកស្រី បានបន្ថែមថា គេសង្ឃឹមថា មីយ៉ាន់ម៉ានឹងការពារសុវត្ថិភាពបុគ្គលិក និងគម្រោងរបស់ចិនប្រកបដោយប្រសិទ្ធភាពក្នុងប្រទេសមីយ៉ាន់ម៉ា និងបង្កើតបរិយាកាសសុវត្ថិភាពសម្រាប់ការផ្លាស់ប្តូរ និងកិច្ចសហប្រតិបត្តិការ។