តំណាង ប.ស.ស. និងតំណាងសាជីវកម្មហិរញ្ញវត្ថុអន្តរជាតិ (IFC) បានជួបប្រជុំពិភាក្សាគ្នាស្ដីពី ការជួយសម្រួលដល់កំណើននៃទីផ្សារមូលធនបំណុលរបស់កម្ពុជា
ភ្នំពេញ៖ ដោយទទួលបានការអនុញ្ញាតពីសំណាក់ ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដុះបណ្ដាលវិជ្ជាជីវៈ នាព្រឹកថ្ងៃទី២២ ខែសីហា ឆ្នាំ២០២៤នេះ លោក គាត ពុធណារិទ្ធ ប្រធាននាយកដ្ឋានគ្រប់គ្រងការវិនិយោគសន្ដិសុខសង្គម នៃបេឡាជាតិសន្ដិសុខសង្គម និងមន្រ្ដីជំនាញ ជួបប្រជុំពិភាក្សាជាមួយមន្រ្ដីជាន់ខ្ពស់នៃសាជីវកម្មហិរញ្ញវត្ថុអន្តរជាតិ (IFC) ស្ដីពីការជួយសម្រួលដល់កំណើននៃទីផ្សារមូលធនបំណុលរបស់កម្ពុជា។
ក្នុងកិច្ចប្រជុំនេះ ភាគីទាំងពីរបានពិភាក្សាយ៉ាងស៊ីជម្រៅ ដោយភាគី ប.ស.ស. បានបង្ហាញពីទិដ្ឋភាពជាក់ស្ដែងបច្ចុប្បន្ន លើកត្តាបញ្ហាប្រឈមមួយចំនួននៃកម្រិតនយោបាយ និងឧបសគ្គក្នុងការចូលរួមក្នុងទីផ្សារ ប៉ុន្ដែក្រុមការងារជំនាញនៅតែបន្ដរៀបចំផែនការ ព្រមទាំងយុទ្ធសាស្ត្រអនុវត្តនៃការវិនិយោគ និងស្វែងរកឱកាសផ្សេងៗសម្រាប់ចូលរួមក្នុងទីផ្សារ ដើម្បីរួមចំណែកលើកកម្ពស់ និងពង្រីកការអនុវត្តរបបសន្តិសុខសង្គមកម្ពុជា ទៅដល់ប្រជាជនគោលដៅឱ្យកាន់តែទូលំទូលាយ និងឆ្ពោះទៅរកការគ្របដណ្តប់សុខភាពជាសកល។
សូមបញ្ជាក់ថា៖ កិច្ចប្រជុំនេះ មានវត្តមានអញ្ជើញចូលរួមពីថ្នាក់ដឹកនាំ មន្ត្រី បុគ្គលិកនៃ ប.ស.ស. និងតំណាងសាជីវកម្មហិរញ្ញវត្ថុអន្តរជាតិ (IFC) សរុបចំនួន ១៥រូប នៅទីស្នាក់ការកណ្តាលនៃ ប.ស.ស. រាជធានីភ្នំពេញ៕