ឧបនាយករដ្ឋមន្ត្រី សាយ សំអាល់ ណែនាំឱ្យរដ្ឋបាលខេត្តពោធិ៍សាត់ ត្រៀមរៀបចំមូលដ្ឋានខេត្ត ឲ្យក្លាយជាទីក្រុងតូចច្រឡឹង ដើម្បីទាក់ទាញទេសចរណ៍ មកលំហែរកម្សាន្ត

ភ្នំពេញ៖ ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានណែនាំឲ្យរដ្ឋបាលខេត្តពោធិ៍សាត់ ត្រៀមផែនការរៀបចំមូលដ្ឋានខេត្ត ឲ្យក្លាយជាទីក្រុងតូចច្រឡឹង ដើម្បីទាក់ទាញទេសចរណ៍ជិត ឆ្ងាយមកលំហែរកម្សាន្ត ដែលក្នុងនោះផែនការមេនឹងត្រូវរៀបចំឱ្យបានគ្រប់ ក្រុង ស្រុក សម្រួលដល់ការអភិវឌ្ឍ និងអ្នកវិនិយោគិន ដែលមានបំណងមកវិនិយោគនៅកន្លែងនោះ។ ឯកឧត្តមឧបនាយករដ្ឋមន្ត្រី បានណែនាំបែបនេះ ធ្វើឡើងក្នុងកិច្ចប្រជុំជម្រុញការចុះបញ្ជីដីធ្លីក្នុងភូមិសាស្ត្រខេត្តពោធិ៍សាត់ នៅរសៀលថ្ងៃទី២២ ខែសីហា ឆ្នាំ២០២៤។

ឯកឧត្តមឧបនាយករដ្ឋមន្ត្រី សាយ សំអាល់ បានមានប្រសាសន៍ថា ការងារចាំបាច់របស់ក្រសួងពីពេលនេះទៅមុខទៀត គឺការរៀបចំដែនដី នគរូបនីយកម្ម និងសំណង់ ដោយប្រែក្លាយសង្គមកម្ពុជាឱ្យទៅជាសង្គមស៊ីវិល័យ ព្រមទាំងធ្វើឱ្យប្រជាជនកម្ពុជាច្រើនថែមទៀត មានផ្ទះសម្បែងសមរម្យ ដោយយកចិត្តទុកដាក់គិតគូរលើការរៀបចំបុរីជនបទ ភូមិឋានក្សេមក្សាន្ត និងទ្រនំសុភមង្គល។ រយៈពេលមួយឆ្នាំដើមអាណត្តិទី៧នេះ ក្រសួងរៀបចំដែនដី នគរូបនីយកម្ម និងសំណង់ បានអនុវត្តការងារប្រកបដោយប្រសិទ្ធភាព សាមគ្គីភាព ឯកភាពផ្ទៃក្នុង ដោះស្រាយបាននូវបញ្ហាចម្រូងចម្រាសក្នុងសង្គមនាពេលបច្ចុប្បន្ន។

ឯកឧត្តមឧបនាយករដ្ឋមន្ត្រី បានបន្តថា សព្វថ្ងៃក្រសួងបាននឹងកំពុងអនុវត្តនូវសមរភូមិ៤ធំៗរួមមាន៖

-សមរភូមិទី១៖ ការទ្រទ្រង់សាមគ្គីភាព ឯកភាពផ្ទៃក្នុង ដើម្បីធានាដំណើរការស្ថាប័ន កសាងជំនឿ និងទំនុកចិត្តលើការដឹកនាំរួម។

-សមរភូមិទី២៖ ការជម្រុញចុះបញ្ជីដីធ្លីបង្ហើយ  បរិយាកាសគ្មានវិវាទ និងសេវាគាប់ចិត្ត ដើម្បីកាត់បន្ថយ និងលុបបំបាត់បញ្ហាចម្រូងចម្រាស់ក្នុងសង្គមនាពេលបច្ចុប្បន្ន និងពង្រីកបន្ថែមចរន្តថវិកាជាតិ។

-សមរភូមិទី៣៖ ការកសាង និងពូនជ្រំរដ្ឋបាលសាធារណ:ទំនើប ដែលរួមមានការពង្រឹងសមត្ថភាពមន្ត្រី ការលើកទឹកចិត្តមន្រ្តី ការពង្រឹងសមត្ថភាពស្ថាប័ន និងការរៀបចំបន្ថែមនូវសេចក្ដីព្រាងច្បាប់ផ្សេងៗ។

-សមរភូមិទី៤៖ ការរៀបចំដែនដី នគររូបនីយកម្មកម្ពុជាឱ្យក្លាយជាទឹកដីសុវណ្ណភូមិដូចជាការរៀបចំទីក្រុង ទីប្រជុំជន បុរីជនបទ ភូមិឋានក្សេមក្សាន្ត និងទ្រនំសុភមង្គលជាដើម។

តាមរបាយការណ៍របស់ឯកឧត្តម ខូយ រីដា អភិបាលខេត្តពោធិ៍សាត់ បានឲ្យដឹងថា ការអនុវត្តផែនការចុះបញ្ជីមានលក្ខណ:ប្រព័ន្ធនិងការចុះបញ្ជីដីធ្លីដាច់ដោយដុំរួមទាំងការចុះបញ្ជីដីរដ្ឋទៅតាមគោលការណ៍និងនីតិវិធីច្បាប់ចាប់តាំងពីឆ្នាំ២០០៩ រហូតដល់ថ្ងៃទី១៥ ខែសីហា ឆ្នាំ២០២៤នេះ ទូទាំងខេត្តសម្រេចបាន ១៣.៧៧៦ក្បាលដី និងចុះបញ្ជីបន្តចំនួន ២៨.៥២៨ក្បាលដី ចុះបញ្ជីដីសម្បទានសេដ្ឋកិច្ចចំនួន ៣៤៩ក្បាលដី។ ការងារសំណង់ដែលមានការអនុញ្ញាត ៨១២គម្រោង ការចុះបញ្ជីមានលក្ខណ:ជាប្រព័ន្ធគឺបានបិទផ្សាយជាសាធារណ: ៣១៣.១០៣ក្បាលដី បញ្ចូលទិន្នន័យចំនួន ៣៥៥.៣០៨ក្បាលដី គូរក្បាលដីចំនួន ៣៤១.៦៧៣ក្បាលដី ចេញប័ណ្ណចំនួន ២៩៩.៦៦២ប័ណ្ណ និងបានចែកជូនប្រជាពលរដ្ឋ ២០២.៥៣១ប័ណ្ណ។

ដោយឡែកចំពោះការចុះបញ្ជីដីធ្លីក្នុងតំបន់២ នៃតំបន់បឹងទន្លេសាប ពាក់ព័ន្ធចំនួន៣ស្រុកគឺ៖ ស្រុកបាកាន, ស្រុកកណ្តៀង និងស្រុកក្រគរបានប្រមូលទិន្នន័យចំនួន ៧.០៣៣ក្បាលដី មាន ៤៦ភូមិ សព្វថ្ងៃបាននិងកំពុងបន្តចុះអនុវត្ត។ ដើម្បីពន្លឿនការចុះបញ្ជីដីធ្លី ឯកឧត្តមឧបនាយរដ្ឋមន្ត្រី បានផ្តល់ឧបករណ៍ សម្ភារបច្ចេកទេសតម្រូវការចាំបាច់មួយចំនួន ដល់ប្រធានមន្ទីររៀបចំដែនដីនគរូបនីកម្ម សំណង់ និងសុរិយោដីខេត្តពោធិ៍សាត់ ផងដែរ ៕