ឯកឧត្ដម សរ សុពុត្រា អភិបាលខេត្តស្ទឹងត្រែង ណែនាំឲ្យមន្ត្រីទាំងអស់ យកចិត្តទុកដាក់ បំពេញកិច្ចការងារបម្រើប្រជាពលរដ្ឋ
ភ្នំពេញ៖ ឯកឧត្តម សរ សុពុត្រា អភិបាលខេត្តស្ទឹងត្រែង បានថ្លែងណែនាំឲ្យមន្ត្រីក្រោមឱវាទទាំងអស់ យកចិត្តទុកដាក់ក្នុងការ បំពេញកិច្ចការងារបម្រើប្រជាពលរដ្ឋ ឲ្យកាន់តែមានប្រសិទ្ធភាព ។
ក្នុងឱកាសអញ្ជើញសំណេះសំណាលជាមួយថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ នៃរដ្ឋបាលស្រុក-ឃុំ ក្នុងស្រុកសៀមប៉ាង ខេត្តស្ទឹងត្រែង កាលពីថ្ងៃព្រហស្បតិ៍ ទី២២ ខែសីហា ឆ្នាំ២០២៤ ឯកឧត្តម សរ សុពុត្រា ណែនាំដល់អភិបាលស្រុក ត្រូវតំឡើងឋានន្តរសក្តិឱ្យមន្រ្តីតាមវេនឱ្យបានទៀងទាត់ និងគ្រឿងឥស្សរិយយស ត្រូវផ្តល់ជូនដូចគ្នាទៅតាមឆ្នាំនិមួយៗ ។
ជាមួយគ្នានោះឯកឧត្តម សរ សុពុត្រា អភិបាលខេត្តស្ទឹងត្រែង ក៏បានណែនាំឲ្យពង្រឹងលើក្រមសីលធម៌របស់មន្ត្រី និងពង្រឹងលើការចូលរួមគោរពទង់ជាតិ ។
ទន្ទឹមគ្នានោះឯកឧត្តម សរ សុពុត្រា អភិបាលខេត្ត បានមានប្រសាសថាការចូលរួមបំរើប្រជាពលរដ្ឋ ត្រូវឈរលើគោលការស្មោះត្រង់ បំរើសេវាសាធារណៈ រក្សាបាននូវសុវត្ថិភាព សន្តិសុខ សណ្តាប់ធ្នាប់សាធារណៈឱ្យបានល្អប្រសើរ និងបំបាត់ឱ្យបាននូវល្បែងស៊ីសងគ្រប់រូបភាព ការកាប់បំផ្លាញព្រៃឈើ ការទន្រ្ទានដីធ្លីដោយខុសច្បាប់ពីសំណាក់ជនខិលខូច ។
ឯកឧត្តម សរ សុពុត្រា បានចង្អុលបង្ហាញ មន្រ្តីរាជការ កងកម្លាំងប្រដាប់អាវុធ នៃរដ្ឋបាលស្រុក-ឃុំ ក្នុងស្រុកសៀមប៉ាង នូវគោលការដឹកនាំ ៥ចំនុច រួមមាន៖ ១.ថ្នាក់ដឹកនាំត្រូវមានគុណធម៌ចំពោះមន្ត្រីក្រោមឱវាទ, ២.មន្ត្រីក្រោមឱវាទត្រូវតែមានភាពស្មោះត្រង់ ការទុកចិត្តការជឿជាក់ទៅដល់ថ្នាក់ដឹកនាំរបស់ខ្លួន។, ៣.ត្រូវមានសមត្ថភាពនិងត្រូវបង្កើនចំណេះដឹងឲ្យបានជាប់ជាប្រចាំ។, ៤.ត្រូវមានសុជីវធម៌ចំពោះប្រជាពលរដ្ឋក្នុងមូលដ្ឋាន, ៥.ត្រូវមានការទទួលខុសត្រូវ ៕