គណៈប្រតិភូ នាយទាហានវ័យក្មេង នៃកងទ័ពប្រជាជនវៀតណាម បំពេញទស្សនកិច្ចនៅបញ្ជាការដ្ឋានវិស្វកម្មកងទ័ពជើងគោក

ភ្នំពេញ៖ នៅថ្ងៃចន្ទ ទី២៦ ខែសីហា ឆ្នាំ២០២៤ គណៈប្រតិភូ នាយទាហានវ័យក្មេង នៃកងទ័ពប្រជាជនវៀតណាម ដឹកនាំដោយលោកវរសេនីយ៍ឯក ជិន ហ៊ីវយុង អនុប្រធានផ្នែកសម្ព័ន្ធយុវជនកងទ័ព អគ្គស្នងការនយោបាយនៃកងទ័ពប្រជាជនវៀតណាម បានធ្វើទស្សនកិច្ចនៅបញ្ជាការដ្ឋានវិស្វកម្មកងទ័ពជើងគោក ត្រូវបានទទួលស្វារគមន៍យ៉ាងកក់ក្តៅពីសំណាក់ ឯកឧត្តម ឧត្តមសេនីយ៍ត្រី ទិត សុជាតិ មេបញ្ជាការរង និងជានាយសេនាធិការ បញ្ជាការដ្ឋានវិស្វកម្មកងទ័ពជើងគោក ។

ក្នងនាមឯកឧត្តម ឧត្តមសេនីយ៍ឯក អ៊ុច វ៉ាន់ថា មេបញ្ជាការរងកងទ័ពជើងគោក មេបញ្ជាការបញ្ជាការដ្ឋានវិស្វកម្ម ឧត្តមសេនីយ៍ត្រី ទិត សុជាតិ មានប្រសាសន៍ថា ដំណេីរទស្សនកិច្ចនេះបានពង្រឹងពង្រីកកិច្ចសហប្រតិបត្តិការយោធារវាងប្រទេសទាំងពីរ កម្ពុជា-វៀតណាមឱ្យកាន់តែល្អប្រសើរ ក៏ដូចជាការផ្លាស់ប្តូរបទពិសោធន៍ នាយទាហានវ័យកេ្មងរវាងប្រទេសកម្ពុជា-វៀតណាមផងដែរ។ បន្ថែមពីនេះទៀតដំណើរទស្សនកិច្ចនេះក៏បានផ្តល់នូវភាពស្និតស្នាល និងទំនាក់ទំនងល្អនូវកិច្ចសហប្រតិបត្តិការរវាងកងទ័ព នៃប្រទេសទាំងពីរ កម្ពុជា-វៀតណាម និយាយជារួម និងបង្កើនចំណងសាមគ្គីភាពជាមួយបញ្ជាការដ្ឋានវិស្វកម្ម និយាយដោយឡែក ។

ថ្លែងក្នុងឱកាសនោះទៀតផងដែរលោក ក៏បានជម្រាបជូនប្រតិភូ អំពីសមិទ្ធផលសំខាន់ៗ ដែលបញ្ជាការដ្ឋានវិស្វកម្ម សម្រេចបាននាពេលកន្លងមក ជាពិសេសដើម្បីជាការចែករំលែកបទពិសោធន៍ឲ្យគ្នាទៅវិញទៅមក រវាងកងទ័ពនៃប្រទេសទាំងពីរ ក្នុងភាពជាមិត្ត ។

ជាកិច្ចឆ្លើយតបលោកវរសេនីយ៍ឯក ជិន ហ៊ីវយុង ក្នុងនាមតំណាងគណៈប្រតិភូ នាយទាហានវ័យក្មេង នៃកងទ័ពប្រជាជនវៀតណាម បានថ្លែងអំណរគុណដល់មេបញ្ជាការបញ្ជាការដ្ឋានវិស្វកម្មកងទ័ពជើងគោក ឯកឧត្ត ឧត្តមសេនីយ៍ត្រី ទិត សុជាតិ និងនាយទាហានជាច្រើនរូបបានផ្តល់ឱកាសឲ្យប្រតិភូវៀតណាមវ័យក្មេងបានជួបសម្តែងការគួរសមនិងស្វែងយល់ជំនាញនៃកងកម្លាំងវិស្វកម្មកម្ពុជានាពេលនេះ ៕