អាជ្ញាធរជាតិ ប្រយុទ្ធប្រឆាំងគ្រឿងញៀន បើកកិច្ចប្រជុំ ពិនិត្យ កែសម្រួលនិយាមនីតិវិធីប្រតិបត្តិ ស្តីពីការគ្រប់គ្រងសារធាតុញៀន និងសារធាតុគីមីផ្សំ
ភ្នំពេញ៖ នៅទីស្តីការក្រសួងមហាផ្ទៃ នាព្រឹកថ្ងៃទី២៩ ខែសីហា ឆ្នាំ២០២៤ ឯកឧត្តម ព្រុំ សុខា ទេសរដ្ឋមន្ត្រី អនុប្រធានប្រចាំការ អាជ្ញាធរជាតិ ប្រយុទ្ធប្រឆាំងគ្រឿងញៀន (អ.ជ.ប.គ.ញ) បានអញ្ជើញដឹកនាំកិច្ចប្រជុំ ដើម្បីពិនិត្យ និងកែសម្រួលនិយាមនីតិវិធីប្រតិបត្តិ ស្តីពីការគ្រប់គ្រងត្រួតពិនិត្យសារធាតុញៀន និងសារធាតុគីមីផ្សំ ដោយមានការអញ្ជើញចូលរួមពី ឯកឧត្តម លោកជំទាវ រដ្ឋមន្ត្រី រដ្ឋលេខាធិការ អនុរដ្ឋលេខាធិការ អន្តរក្រសួង ព្រមជាមួយមន្រ្តីជំនាញពាក់ព័ន្ធជាច្រើនរូបទៀតផងដែរ។
ឯកឧត្តមទេសរដ្ឋមន្ត្រី បានឯកភាពលើទម្រង់ និងខ្លឹមសារនៃសេចក្តីព្រាងនិយាមនីតិវិធីប្រតិបត្តិ ដែលលេខាធិការដ្ឋាន នៃក្រុមការងារអន្តរក្រសួងត្រួតពិនិត្យសារធាតុញៀន និងសារធាតុគីមីផ្សំ ដែលបានរួមគ្នាសហការពិនិត្យពិភាក្សា និងកែសម្រួល ផ្តល់ធាតុចូលល្អៗបន្ថែម ដើម្បីធ្វើឱ្យសេចក្ដីព្រាង មានទម្រង់ និងខ្លឹមសារពេញលេញគ្រប់ជ្រុងជ្រោយ ដែលស្របតាមស្មារតី និងការផ្តល់ធាតុចូលចុងក្រោយ របស់ឯកឧត្តម លោកជំទាវ រដ្ឋមន្ត្រីក្រសួង និងប្រធានស្ថាប័ន ជំនាញពាក់ព័ន្ធជាសមាជិកក្រុមការងារអន្តរក្រសួង ៕
