ឥណ្ឌូនេស៊ី ផ្តល់ជំនួយយោធាដល់កម្ពុជា មានកាំភ្លើងវែង អាវុធខ្លី និងគ្រាប់កាំភ្លើង គិតជាទឹកប្រាក់ ៥០ម៉ឺនដុល្លារ

ភ្នំពេញ៖ រដ្ឋាភិបាលសាធារណរដ្ឋឥណ្ឌូនេស៊ី បានផ្តល់ជំនួយយោធាដល់កម្ពុជា ក្នុងនោះរួមមានកាំភ្លើងវែង អាវុធខ្លី និងគ្រាប់កាំភ្លើង គិតជាទឹកប្រាក់៥០០,០០០ដុល្លារ។
ជំនួយនេះត្រូវបានប្រគល់ដោយ ឯកឧត្ដមបណ្ឌិត Santo Darmosumarto ឯកអគ្គរដ្ឋទូតឥណ្ឌូណេស៊ីប្រចាំកម្ពុជា និងនាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកង ទ័ពជើងគោក នៅឯពិធីមួយរៀបចំឡើងនៅឯព្រលានយន្តហោះយោធា រាជធានីភ្នំពេញ។

ជំនួយយោធាដល់កម្ពុជា រួមមាន៖ ១៖ អាវុធវែង SS2-V5 A1 Rifie ចំនួន១៥០ដើម, ២៖ អាវុធខ្លី G2 Elite Pistol ចំនួន២០ដើម, ៣៖ គ្រាប់ទំហំ 5,56x45mm ចំនួន ៥០០,០០០គ្រាប់ (គ្រាប់ M16), ៤៖ គ្រាប់ទំហំ 9x19mm ចំនួន ៥០០,០០០គ្រាប់ (គ្រាប់អាវុធខ្លី)។

ឯកឧត្ដម Santo បានលើកឡើងបន្ថែមថា «ខ្ញុំពិតជាមានសោមនស្សរីករាយ ដែលបានឃើញទំនាក់ទំនងដ៏រឹងមាំបែបនេះ បានផ្តល់នូវមូលដ្ឋានគ្រឹះសម្រាប់ការលើកកម្ពស់យ៉ាងសំខាន់នៃកិច្ចសហប្រតិបត្តិការទ្វេភាគី របស់យើងក្នុងវិស័យនានាក្នុងរយៈពេលប៉ុន្មានឆ្នាំចុងក្រោយនេះ។ យើងមានកិត្តិយសដែលបានធ្វើរឿងនេះចំ ពេលដែលយើងកំពុងប្រារព្ធខួប៦៥ឆ្នាំនៃទំនាក់ទំនងការទូតរបស់យើង»។
«ព្រឹត្តិការណ៍នៅថ្ងៃនេះបានបង្ហាញពីទំនាក់ទំនងយូរអង្វែងរវាងយោធារវាង ឥណ្ឌូណេស៊ី និងកម្ពុជា»។

ឯកឧត្ដម Santo ក៏បានសម្តែងក្តីសង្ឃឹមដែរថាការបន្តការពង្រឹងកិច្ចសហប្រតិបត្តិការលើវិស័យការពារជាតិ និងសន្តិសុខទ្វេភាគីនឹងរួមចំណែកជាវិជ្ជមានមិនត្រឹមតែ ឆ្ពោះទៅរកសន្តិភាព និងស្ថិរភាពនៅក្នុងប្រទេសទាំងពីរប៉ុណ្ណោះទេ ប៉ុន្តែក៏ដើម្បីតំបន់ទាំងមូលផងដែរ។

ឯកឧត្ដមបានបន្តទៀតថា «នៅក្នុងបរិយាកាសសន្តិសុខសកល ដែលមិនអាចព្យាករ រឹតតែខ្លាំងឡើង វាគឺជារឿងដ៏សំខាន់សម្រាប់ឥណ្ឌូណេស៊ី និងកម្ពុជា ក្នុងនាមជាប្រទេសជិតខាង និងសមាជិកអាស៊ាន ត្រូវគាំទ្រកិច្ចខិតខំប្រឹងប្រែងពង្រឹងសមត្ថភាពយោធារបស់គ្នាទៅវិញទៅមក»។

ជំនួយដែលផ្តល់ជូនរដ្ឋាភិបាលកម្ពុជា ត្រូវបានផលិតដោយក្រុមហ៊ុនផលិតបរិក្ខារ យោធារបស់ឥណ្ឌូណេស៊ី មានឈ្មោះ PT. PINDAD។ វាបង្ហាញពីសក្ដានុពលឧស្សាហកម្ម យោធារបស់ឥណ្ឌូនេស៊ី និងបើកទំព័រថ្មីនៃកិច្ចសហប្រតិបត្តិការការពារជាតិ និងសន្តិសុខរវាងឥណ្ឌូណេស៊ី-កម្ពុជា ដែលក្នុងរយៈពេលជាច្រើនឆ្នាំកន្លងមកនេះ ដែលត្រូវបានឃើញថា បានកសាងសមត្ថភាពជាច្រើន និងការផ្លាស់ប្តូរការសិក្សារវាងប្រទេសទាំងពីរ។

កិច្ចសហប្រតិបត្តិការលើវិស័យការពារជាតិ និងសន្តិសុខរវាងឥណ្ឌូណេស៊ី និងកម្ពុជា ត្រូវបានផ្តួចផ្តើមឡើងក្នុងទសវត្សរ៍ឆ្នាំ១៩៧០ និងត្រូវបានពង្រឹងបន្ថែមក្នុងទសវត្សរ៍ឆ្នាំ១៩៩០។
បន្ទាប់ពីមានកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ឥណ្ឌូណេស៊ីបានបញ្ជូនកងកម្លាំងរក្សាសន្តិភាពជាង ៣៩០០នាក់ ចូលរួមក្នុងបេសកកម្មអ៊ុនតាក់ពីឆ្នាំ១៩៩២ ដល់ឆ្នាំ១៩៩៣។ ដោយមានការស្វាគមន៍យ៉ាងកក់ក្តៅពីប្រជាជនកម្ពុជា ទំនាក់ទំនងរវាងកងកម្លាំងរក្សាសន្តិភាពឥណ្ឌូណេស៊ី និងសហគមន៍មូលដ្ឋាន បានធ្វើឱ្យ ទំនាក់ទំនងនៃប្រទេសទាំង២ មានភាពរឹងមាំឡើងវិញ ក្រោយភាពចលាចលជាច្រើនឆ្នាំក្នុងអំឡុងសង្គ្រាមត្រជាក់។

យោធាឥណ្ឌូណេស៊ីតែងតែផ្តល់ការហ្វឹកហ្វឺនដល់អង្គភាពផ្សេងៗនៃកងយោធពលខេមរភូមិន្ទ រួមទាំងកងបញ្ជាការពិសេស (កងពលតូចលេខ៩១១) និងទីបញ្ជាការកងអង្គរក្ស។ កិច្ចសហប្រតិបត្តិការបែបនេះក៏ត្រូវបានគូសបញ្ជាក់ផងដែរ ដោយការផ្លាស់ប្តូរទស្សនកិច្ចជាញឹកញាប់ក្នុងចំណោមមន្ត្រីជាន់ខ្ពស់យោធានៃប្រទេសទាំងពីរ។

ជាការឆ្លើយតបនាយឧត្តមសេនីយ៍ ម៉ៅ សុផាន់ បានថ្លែងថា តាងនាមឲ្យក្រសួងការពារជាតិ អគ្គបញ្ជាការ បញ្ជាការដ្ឋានកងទ័ពជើងគោក និងខ្លួន ឯកឧត្តម សូមថ្លែងអំណរគុណ ដល់រដ្ឋាភិបាល ក្រសួងការពារជាតិ និងកងទ័ពឥណ្ឌូណេស៊ី ដែលបានផ្តល់ជំនួយយោធាឥតសំណង មានដូចជាអាវុធវែង-ខ្លី និងគ្រាប់ធុន ស្រាល ដល់បញ្ហាការដ្ឋានទ័ពពិសេស កងទ័ពជើងគោក ឆ្លើយតបតាមតម្រូវការ ហ្វឹកហ្វឺន ដើម្បីពង្រឹងសមត្ថភាព គុណភាពកងទ័ព ក្នុងការបំពេញភារកិច្ចជូនជាតិ មាតុភូមិ។

ឯកឧត្ដមនាយឧត្តមសេនីយ៍ បានជូនពរឲ្យកិច្ចសហប្រតិបត្តិការល្អ រវាងប្រទេស ប្រជាជន និងកងទ័ពយើងទាំងពីរ បានស្ថិតស្ថេររឹងមាំជានិច្ចនិរន្តរ៍ និងសូមជូនពរ ឯកឧត្តមអគ្គរដ្ឋទូត និងគណៈប្រតិភូ សូមមាន សុខភាពល្អបរិបូរណ៍ សុភមង្គល និងទទួលបានជោគជ័យគ្រប់ភារកិច្ច៕