ឯកឧត្តម ប៊ុន ហុន ណែនាំអាជ្ញាធរខេត្តតាកែវ បង្កើនការផ្សព្វផ្សាយអំពីផលប៉ះពាល់សុខភាព ចំពោះការប្រើប្រាស់បារីអេឡិចត្រូនិក
ភ្នំពេញ៖ ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ បានធ្វើការណែនាំដល់សមត្ថកិច្ចពាក់ព័ន្ធគ្រប់លំដាប់ថ្នាក់ យកចិត្តទុកដាក់ បង្កើនការផ្សព្វផ្សាយអំពីផលប៉ះពាល់សុខភាព ចំពោះការប្រើប្រាស់បារីអេឡិចត្រូនិក សំដៅរួមចំណែកលើកកម្ពស់សុខុមាលភាពសង្គម និងបង្កើនធនធានមនុស្ស។
ការលើកឡើងរបស់ ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ នាឱកាសអញ្ជើញជាអធិបតីក្នុងកិច្ចប្រជុំស្ដីពី ការបូកសរុបលទ្ធផលការអនុវត្តគោលនយោបាយភូមិ-ឃុំសង្កាត់ មានសុវត្ថិភាព ប្រចាំឆមាសទី១ ឆ្នាំ២០២៤ និងលើកទិសដៅអនុវត្តបន្ត ឆមាសទី២ ឆ្នាំ២០២៤ ក្នុងដែនសមត្ថកិច្ចក្រសួងមហាផ្ទៃ នៅរដ្ឋបាលខេត្តតាកែវ ដោយមានការអញ្ជើញចូលរួមពី ឯកឧត្តម យស ណាស៊ី ប្រធានក្រុមប្រឹក្សាខេត្ត និងឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ និងអ្នកពាក់ព័ន្ធជាច្រើនរូបទៀត។
ក្នុងពិធីនេះដែរ លោក កង អាណាន់ អភិបាលក្រុងដូនកែវ បានថ្លែងថា កន្លងមកនេះអាជ្ញាធរក្រុង បានសហការជាមួយមន្រ្តីជំនាញ សមត្ថកិច្ចពាក់ព័ន្ធ និងគណៈគ្រប់គ្រងសាលា បានចុះត្រួតពិនិត្យជាប្រចាំ នៅតាមគ្រឹះស្ថានសិក្សានានាទាំងរដ្ឋ និងឯកជនទាំងអស់ ហើយក៏បានរកឃើញសាលារៀនមួយចំនួនបានដាក់លក់បារីអេឡិចត្រូនិក ដែលអាជ្ញាធរ និងមន្រ្តីជំនាញបានហាមឃាត់ ហើយក៏បានអប់រំណែនាំដល់អាជីវករលក់ និងធ្វើកិច្ចសន្យាបើសិនមានការដាក់លក់លើកក្រោយ នឹងត្រូវទទួលទោសចំពោះមុខច្បាប់ដែលបានកំណត់ ដោយគ្មានការលើកលែង។
លោកអភិបាលក្រុងដូនកែវ បានថ្លែងបន្តថា បារីអេឡិចត្រូនិក គឺជាបារីមួយប្រភេទមានក្លិនក្រអូប ហើយមានផ្ទុកសាធាតុញៀនម្យ៉ាង ដែលធ្វើឱ្យប៉ះពាល់ដល់សុខភាព និងអាចបង្ករជាគ្រោះថ្នាក់ដល់អាយុជីវិតសិស្សពេលទិញយកទៅប្រើប្រាស់។ ដូច្នេះដើម្បីរួមចំណែកលុបបំបាត់ការចរាចរណ៍លក់ដូរបារីអេឡិចត្រូនិកនេះតទៅទៀត គប្បីអាជ្ញាធរមូលដ្ឋានភូមិ-ឃុំ សង្កាត់ នឹងមន្រ្តីពាក់ព័ន្ធទាំងអស់សហការគ្នាផ្សព្វផ្សាយឱ្យបានទូលំទូលាយ ដល់សិស្សទាំងអស់ ពីផលប៉ះពាល់ និងគ្រោះថ្នាក់ដែលបណ្ដាលមកពីការប្រើប្រាស់បារីអេឡិចត្រូនិកនេះ។
ឆ្លើយតបនឹងបញ្ហានេះដែរ ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ បានថ្លែងថា បារីអេឡិចត្រូនិកនេះ បង្ករគ្រោះថ្នាក់ណាស់ វាធ្វើឱ្យប៉ះពាល់ដល់សួត និងខួរក្បាល ដូច្នេះហើយរាជរដ្ឋាភិបាល មិនអនុញ្ញាត្តឱ្យមានការដាក់លក់ រឺប្រើប្រាស់ទេ តែយ៉ាងណាក៏នៅតែមានជនខិលខូច លួចលាក់លក់ បន្លំជាមួយនំចំណីដែលដាក់លក់នៅតាមសាលារៀនដដែល ដូច្នេះទាមទារឱ្យអាជ្ញាធរ សមត្ថកិច្ចពាក់ព័ន្ធគ្រប់លំដាប់ថ្នាក់ យកចិត្តទុកដាក់ បង្កើនការផ្សព្វផ្សាយដល់អាណាព្យាបាល ពិសេសយុវជន សិស្សានុសិស្ស និងចុះពិនិត្យជាប្រចាំ នៅតាមសាលារៀននានា ដើម្បីសំដៅរួមចំណែកលើកកម្ពស់សុខុមាលភាពសង្គម និងបង្កើនធនធានមនុស្ស ពិសេសលើកកម្ពស់គោលនយោបាយភូមិឃុំសង្កាត់មានសុវត្ថិភាពផងដែរ ៕
