លោក Netanyahu ប្តេជ្ញាថា ក្រុមហាម៉ាសនឹងបង់ថ្លៃ សម្រាប់ការចោទប្រកាន់ថាបានសម្លាប់ចំណាប់ខ្មាំង ៦នាក់នៅក្នុងផ្លូវរូងក្រោមដីក្នុងតំបន់ Gaza
ហ្សេរុយសាឡឹម៖ នាយករដ្ឋមន្ត្រីអ៊ីស្រាអែល លោក Benjamin Netanyahu បានប្តេជ្ញាកាលពីថ្ងៃចន្ទថា ក្រុមហាម៉ាសនឹងបង់ថ្លៃ សម្រាប់ការចោទប្រកាន់ថាបានសម្លាប់ចំណាប់ខ្មាំង ៦នាក់នៅក្នុងផ្លូវរូងក្រោមដី Gaza នៅចុងសប្តាហ៍។
លោក Netanyahu បានឲ្យដឹងនៅក្នុងសន្និសីទសារព័ត៌មានមួយថា អ៊ីស្រាអែលនឹងមិនព្រងើយកន្តើយចំពោះការសម្លាប់រង្គាលនេះទេ។ ក្រុមហាម៉ាសនឹងបង់ថ្លៃយ៉ាងធ្ងន់ធ្ងរសម្រាប់រឿងនេះ ដោយបន្ថែមថាតម្លៃនឹងត្រូវបានកំណត់ក្នុងរយៈពេលខ្លី។
កាលពីថ្ងៃអាទិត្យ កងកម្លាំងការពារអ៊ីស្រាអែល (IDF) បានឲ្យដឹងថា សាកសពចំនួន ៦នាក់ រួមទាំងស្ត្រី ២នាក់ និងបុរស ៤នាក់ ត្រូវបានគេរកឃើញកាលពីថ្ងៃសៅរ៍នៅក្នុងផ្លូវរូងក្រោមដីមួយក្នុងតំបន់ Rafah ភាគខាងត្បូង Gaza។
យោងតាមការវាយតម្លៃដំបូងដោយ IDF ចំណាប់ខ្មាំងត្រូវបានគេប៉ាន់ស្មានថាត្រូវបានសម្លាប់យ៉ាងឃោរឃៅដោយភេរវករហាម៉ាស ៤៨-៧២ម៉ោងមុនពេលដែលទាហានអ៊ីស្រាអែលទៅដល់ពួកគេ។
អ្នកទាំងប្រាំមួយនាក់ត្រូវបានចាប់ធ្វើជាចំណាប់ខ្មាំងក្នុងអំឡុងពេលការវាយប្រហារដ៏គួរឱ្យភ្ញាក់ផ្អើលរបស់ក្រុមហាម៉ាសកាលពីថ្ងៃទី៧ ខែតុលាឆ្នាំ២០២៣ ដែលបានបណ្តាលឱ្យមនុស្សប្រហែល ១,២០០នាក់បានស្លាប់ និងប្រហែល ២៥០នាក់ផ្សេងទៀតត្រូវបានចាប់ខ្លួន។
ទន្ទឹមនឹងនេះ ក្រុមហាម៉ាស់បានបញ្ជាក់នៅក្នុងសេចក្តីថ្លែងការណ៍មួយថា សាកសពត្រូវបានរកឃើញដោយកងទ័ពអ៊ីស្រាអែលនៅក្នុងផ្លូវរូងក្រោមដីក្នុងទីក្រុង Rafah ប៉ុន្តែបានកត់សម្គាល់ថាពួកគេត្រូវបានសម្លាប់ដោយការបាញ់ផ្លោងរបស់អ៊ីស្រាអែល។
ប្រជាជនអ៊ីស្រាអែលរាប់សែននាក់បានប្រមូលផ្តុំគ្នានៅទូទាំងប្រទេសអ៊ីស្រាអែលកាលពីថ្ងៃអាទិត្យ និងថ្ងៃច័ន្ទ ដោយទាមទារឱ្យលោក Netanyahu ចរចាបទឈប់បាញ់ជាមួយក្រុមហាម៉ាស់ ដើម្បីទទួលបានការវិលត្រឡប់មកវិញនៃចំណាប់ខ្មាំងដែលកាន់កាប់នៅតំបន់ហ្គាហ្សា។
នៅក្នុងសន្និសីទសារព័ត៌មានកាលពីថ្ងៃចន្ទ លោក Netanyahu ក៏បានបញ្ជាក់ផងដែរថា អ៊ីស្រាអែលនឹងមិនដកខ្លួនចេញពីច្រករបៀង Philadelphi នោះទេ។
លោកបានបន្តថា យើងត្រូវមានវានៅក្រោមការគ្រប់គ្រងរបស់យើង ដែលមានសារៈសំខាន់សម្រាប់ការទប់ស្កាត់ការរត់ពន្ធអាវុធនាពេលអនាគតពីប្រទេសអេហ្ស៊ីបទៅកាន់តំបន់ហ្គាហ្សា ដោយលោកបានអំពាវនាវឱ្យមានឯកភាពនៅក្នុងគណៈរដ្ឋមន្ត្រីរបស់គាត់ទាក់ទងនឹងបញ្ហានេះ។
កងទ័ពអ៊ីស្រាអែលបានកាន់កាប់ច្រករបៀង Philadelphia ដែលជាតំបន់ការពារទទឹង ១០០ម៉ែត្រ និងបណ្តោយ ១៤គីឡូម៉ែត្រតាមបណ្តោយព្រំដែនអេហ្ស៊ីប-ហ្គាហ្សា និងភាគីប៉ាឡេស្ទីននៃច្រក Rafah ឆ្លងកាត់ក្នុងខែឧសភា ដែលបានបញ្ឈប់ការចូលនៃរថយន្តជំនួយមនុស្សធម៌ពី អេហ្ស៊ីបចូលទៅក្នុងហ្គាហ្សា។
