លោកស្រី Peng Liyuan រួមជាមួយភរិយារបស់មេដឹកនាំនៃប្រទេសអាហ្រ្វិកចូលរួមសន្និសីទស្តីពីការអប់រំស្ត្រីចិន-អាហ្វ្រិក

នាព្រឹកថ្ងៃទី ៥ ខែកញ្ញា សន្និសីទស្តីពីការអប់រំស្ត្រីចិន-អាហ្វ្រិក បានប្រារព្ធធ្វើឡើងនៅសណ្ឋាគាររដ្ឋ Diaoyutai ទីក្រុងប៉េកាំង ក្រោមប្រធានបទ “ចិននិងអាហ្រ្វិកធ្វើប្រតិបត្តិការរួម ដើម្បីពង្រឹងសមត្ថភាពរបស់ស្ត្រីតាមរយៈការអប់រំ” ។
លោកស្រី Peng Liyuan ភរិយារបស់លោកប្រធានរដ្ឋចិន Xi Jinping និងជាបេសកជនពិសេសរបស់អង្គការយូណេស្កូសម្រាប់ជំរុញការអប់រំកុមារីនិងស្ត្រី បានអញ្ជើញចូលរួមនិងថ្លែងសុន្ទរកថា ។ ភរិយាឬតំណាងរបស់មេដឹកនាំនៃប្រទេសអាហ្រ្វិកចំនួន ២៦ រូប ដែលចូលរួមកិច្ចប្រជុំកំពូលក្រុងប៉េកាំងឆ្នាំ ២០២៤ នៃវេទិកាស្តីពីកិច្ចសហប្រតិបត្តិការចិន-អាហ្វ្រិក បានអញ្ជើញចូលរួមក្នុងកិច្ចប្រជុំនេះ។
ថ្លែងនៅក្នុងសន្និសីទ លោក Peng Liyuan បានលើកឡើងថា ប្រទេសចិន និងអាហ្រ្វិកមានគោលដៅដូចគ្នា ហើយភាគីទាំងពីរគួរតែបន្តផ្សព្វផ្សាយស្មារតីនៃកិច្ចសហប្រតិបត្តិការមិត្តភាពរវាងចិន និងអាហ្រ្វិក រួមគ្នាជំរុញឱ្យការអប់រំកុមារី និងស្ត្រីវិវឌ្ឍទៅតាមទិសដៅដែលប្រកបដោយភាពយុត្តធម៌ បរិយាបន្ន និងគុណភាពខ្ពស់ ក្នុងន័យរួមគ្នាកសាងនិងចែករំលែកពិភពលោកដែលកាន់តែល្អបវរ។
តំណាងនៃប្រទេសនានាបានសម្តែងការកោតសរសើរចំពោះប្រទេសចិនដែលតែងតែ
ផ្តល់ការគាំទ្រ និងជំនួយដល់ប្រទេសអាហ្វ្រិកលើវិស័យពាក់ព័ន្ធនានាក្នុងរយៈពេលជាយូរកន្លងមក ព្រមទាំងបានបង្ហាញពីឆន្ទៈក្នុងការពង្រឹងសាមគ្គីភាព និងកិច្ចសហប្រតិបត្តិការជាមួយប្រទេសចិន ដើម្បីជួយឱ្យស្ត្រីកាន់តែច្រើនមានជីវភាពប្រកបដោយសុភមង្គល ៕