ហ្គាហ្សា ថាមនុស្សរាប់សិបនាក់បានស្លាប់ និងរងរបួសនៅក្នុងការវាយប្រហាររបស់អ៊ីស្រាអែល ទៅលើជំរុំតង់ក្នុងតំបន់

បរទេស៖ នៅព្រឹកថ្ងៃអង្គារ ទី១០ ខែកញ្ញា សេវាកម្មសង្គ្រោះបន្ទាន់សម្រាប់ជនស៊ីវិលនៅក្នុងតំបន់បានឲ្យដឹងថា ការវាយប្រហារតាមអាកាសរបស់អ៊ីស្រាអែលទៅលើជំរុំតង់សម្រាប់ជនភៀសខ្លួនប៉ាឡេស្ទីនបានសម្លាប់ និងបង្ករបួសដល់មនុស្ស ៦៥នាក់ នៅតំបន់ហ្គាហ្សាភាគខាងត្បូង ខណៈយោធាអ៊ីស្រាអ៊ែលបាននិយាយថា ខ្លួនបានកំណត់គោលដៅទៅលើមជ្ឈមណ្ឌលបញ្ជាការរបស់ក្រុមហាម៉ាស។

ប្រជាជន និងក្រុមគ្រូពេទ្យបាននិយាយថា ជំរុំតង់មួយនៅជិតទីក្រុង Khan Younis ក្នុងតំបន់ Al-Mawasi ដែលត្រូវបានកំណត់ជាតំបន់មនុស្សធម៌ ទទួលរងការវាយប្រហារដោយកាំជ្រួចយ៉ាងតិច៤គ្រាប់។ ជំរំនេះមានប្រជាជនប៉ាឡេស្ទីនដែលភៀសខ្លួនចេញពីកន្លែងផ្សេងៗគ្នា។

សេវាសង្គ្រោះបន្ទាន់សម្រាប់ជនស៊ីវិលក្នុងតំបន់ហ្គាហ្សាបាននិយាយថា យ៉ាងហោចណាស់តង់ ២០ត្រូវបានឆេះ ហើយមីស៊ីលបានបណ្តាលឱ្យមានរណ្ដៅជ្រៅដល់ទៅ៩ម៉ែត្រ ខណៈដែលជនរងគ្រោះទាំង ៦៥នាក់នោះ រួមមានស្ត្រី និងកុមារ ប៉ុន្តែមិនបានផ្តល់អំពីចំនួនជាក់លាក់ទេ។

ក្រសួងសុខាភិបាលហ្គាហ្សាមិនមានការអត្ថាធិប្បាយភ្លាមៗ ស្តីពីតួលេខអ្នកស្លាប់នោះទេ។ ប៉ុន្តែមុននេះ ទីភ្នាក់ងារសារព័ត៌មាន Shehab ដែលគាំទ្រដោយក្រុមហាម៉ាសបាននិយាយថា ជនជាតិប៉ាឡេស្ទីន ៤០នាក់ត្រូវបានសម្លាប់។