ក្រសួងសង្គមកិច្ច ប្រកាសបើកប្រាក់សោធនរបបសន្តិសុខសង្គម សម្រាប់ខែកញ្ញា និងខែតុលា ឆ្នាំ២០២៤ និងប្រាក់ឧបត្ថម្ភក្នុងឱកាសពិធីបុណ្យភ្ជុំបិណ្ឌ ជូនអតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក

ភ្នំពេញ៖ ក្រសួងសង្គមកិច្ច អតីតយុទ្ធជន និងយុវនីតិសម្បទា បានចេញសេចក្តីជូនដំណឹងស្តីពី ការបើកប្រាក់សោធនរបបសន្តិសុខសង្គម សម្រាប់ខែកញ្ញា និងខែតុលា ឆ្នាំ២០២៤ និងប្រាក់ឧបត្ថម្ភក្នុងឱកាសពិធីបុណ្យភ្ជុំបិណ្ឌ ឆ្នាំរោង ឆស័ក ពុទ្ធសករាជ២៥៦៨ ជូនអតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក។

យោងអនុក្រឹត្យលេខ ៨៦ អនក្រ.បក ចុះថ្ងៃទី១ ខែមេសា ឆ្នាំ២០២៤ ស្តីពីការផ្តល់ប្រាក់ឧបត្ថម្ភក្នុងឱកាស ពិធីបុណ្យចូលឆ្នាំថ្មីប្រពៃណីជាតិ ឆ្នាំរោង ឆស័ក ពុទ្ធសករាជ ២៥៦៧ និងពិធីបុណ្យភ្ជុំបិណ្ឌ ឆ្នាំរោង ឆស័ក ពុទ្ធសករាជ ២៥៦៨។

ក្រសួងសង្គមកិច្ច អតីតយុទ្ធជន និងយុវនីតិសម្បទា មានកិត្តិយស សូមគោរពជម្រាបជូន ដំណឹងដល់អតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក មេត្តាជ្រាបថា ក្នុងខែកញ្ញា ឆ្នាំ២០២៤ នេះ រាជរដ្ឋាភិបាលបានសម្រេចផ្តល់ប្រាក់ឧបត្ថម្ភក្នុងឱកាសពិធីបុណ្យភ្ជុំបិណ្ឌ ឆ្នាំរោង ឆស័ក ពុទ្ធសករាជ ២៥៦៨ ចំនួន ៥០ ០០០ (ប្រាំម៉ឺន) រៀលក្នុងម្នាក់ ជូនអតីតមន្ត្រីរាជការស៊ីវិល និងអតីតយុទ្ធជន និងផ្តល់ជូន ៥០ ០០០ (ប្រាំម៉ឺន) រៀលក្នុងមួយគ្រួសារ ជូនគ្រួសារជនពលី និងគ្រួសារជនមរណៈ។ ដូចនេះ ប្រាក់ឧបត្ថម្ភក្នុងឱកាស ពិធីបុណ្យភ្ជុំបិណ្ឌ ឆ្នាំរោង ឆស័ក ពុទ្ធសករាជ ២៥៦៨ នឹងត្រូវបើកដំណាលគ្នាជាមួយប្រាក់សោធនរបបសន្តិសុខ សង្គមប្រចាំខែកញ្ញា ឆ្នាំ២០២៤ តែមួយលើក ប៉ុណ្ណោះ យ៉ាងយូរត្រឹមថ្ងៃទី១៥ ខែកញ្ញា ឆ្នាំ២០២៤ និងធ្វើការ បើកផ្តល់ប្រាក់សោធនរបបសន្តិសុខសង្គម ប្រចាំខែតុលា ឆ្នាំ២០២៤ លើកទី១ ក្នុងសប្តាហ៍ទី១ និងលើកទី២ ក្នុងសប្តាហ៍ទី៣ នៃខែតុលា ឆ្នាំ២០២៤។ ដោយឡែក សម្រាប់ការបើកផ្តល់ប្រាក់សោធនរបបសន្តិសុខសង្គម ប្រចាំខែវិច្ឆិកា ឆ្នាំ២០២៤ នឹងត្រូវបានបើកផ្តល់តាមនីតិវិធី ដែលបានកំណត់ជាធរមាន។

សេចក្តីដូចបានជម្រាបជូនខាងលើ សូម អតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក នៅតាមបណ្តារាជធានី ខេត្ត ទាំងអស់មេត្តាជ្រាបជាព័ត៌មាន។ ក្នុងករណីអតីតយុទ្ធជន អតីតមន្ត្រីរាជការស៊ីវិល មានបញ្ហាសុខភាពមិនអាចទៅបើកប្រាក់សោធននៅធនាគារបាន ឬទទួលមរណភាព សូមអ្នកនៅក្នុងបន្ទុក និងអ្នកដែលបានទទួលសិទ្ធិបើកប្រាក់សោធនប្រចាំខែ មេត្តាជូនដំណឹងជាបន្ទាន់មក ក្រសួងសង្គមកិច្ច អតីតយុទ្ធជន និងយុវនីតិសម្បទា ឬ មូលនិធិជាតិជំនួយសង្គម តាមរយៈប្រព័ន្ធទូរស័ព្ទលេខ 015 219 888 – 092 219 888 ដោយសេចក្ដីអនុគ្រោះ ៕