ឯកឧត្ដមសន្តិបណ្ឌិត គៀត ច័ន្ទថារិទ្ធ ដឹកនាំកិច្ចប្រជុំប្រកាសសមាសភាពក្រុមលេខាធិការជួយគណៈបញ្ជាការដឹកនាំរួម
ភ្នំពេញ៖ ឯកឧត្ដម សន្តិបណ្ឌិត គៀត ច័ន្ទថារិទ្ធ រដ្ឋលេខាធិការ ក្រសួងមហាផ្ទៃ និងជាប្រធានគណ:បញ្ជាការដឹកនាំរួម ដើម្បីអនុវត្តផែនការលេខ០០៣ផ.ក ស្ដីពីការចុះ ត្រួតពិនិត្យវត្តមានស្នាក់នៅរបស់ជនបរទេសនៅព្រះរាជាណាចក្រកម្ពុជា នាថ្ងៃទី១២ ខែកញ្ញា ឆ្នាំ២០២៤នេះ បានអញ្ជើញដឹកនាំកិច្ចប្រជុំប្រកាសសមាសភាពក្រុមលេខាធិការជួយគណ:បញ្ជាការដឹកនាំរួម នៅសាលប្រជុំខេត្តកំពត នៃអគារទីស្តីការក្រសួងមហាផ្ទៃ។
កិច្ចប្រជុំនេះ មានវត្តមានចូលរួមពី ឯកឧត្តម ហែម ថេង អនុរដ្ឋលេខាធិការ និងជាអនុប្រធានគណ:បញ្ជាការដឹកនាំរួម, ឯកឧត្តម ឧត្តមសេនីយ៍ឯក ណុប វី អគ្គនាយករងអន្តោប្រវេសន៍ និងជាប្រធានលេខាធិការ ព្រមទាំងសមាជិក-សមាជិកា ដែលមានវត្តមានសរុបចំនួន១៥នាក់។
គោលបំណងនៃកិច្ចប្រជុំ: ទីមួយ គឺជាការប្រកាសសមាសភាពក្រុមលេខាធិការ ជួយគណ:បញ្ជាការដឹកនាំរួម និងទីពីរ គឺជាការណែនាំអំពីតួនាទីភារកិច្ច និងការកំណត់ទិសដៅការងាររបស់ក្រុមលេខាធិការ។
ជាបឋម ឯកឧត្ដម សន្តិបណ្ឌិត មានមតិស្វាគមន៍ និងអនុញ្ញាតឱ្យ ឯកឧត្តម ឧត្តមសេនីយ៍ឯក ណុប វី អគ្គនាយករងអន្តោប្រវេសន៍ និងជាប្រធានលេខាធិការ អានលិខិតបង្គាប់ការលេខ៥១១លបក ស្តីពីការចាត់តាំងសមាសភាពក្រុមលេខាធិការ ជួយគណ:បញ្ជាការដឹកនាំរួមដើម្បីអនុវត្តផែនការលេខ០០៣ផ.ក។
បន្ទាប់មកទៀត ឯកឧត្ដម បានជម្រាបជូនអង្គប្រជុំអំពីស្មារតីផែនការអនុវត្ត លេខ០០៣ផ.ក របស់ក្រសួងមហាផ្ទៃ និងសេចក្តីណែណែនាំ លេខ០០៤ស.ណ.ន/អ.អ របស់អគ្គនាយកដ្ឋានអន្តោប្រវេសន៍ មុននឹងបន្តលើការណែនាំអំពីតួនាទីភារកិច្ចក្រុមលេខាធិការ។
ឆ្លងកាត់ការពិភាក្សាយ៉ាងផុលផុស ឯកឧត្ដម មានមតិបូកសរុបដោយដាក់ចេញនូវទិសដៅការងារចំនួន៣ ដូចខាងក្រោម៖
១. ក្រុមលេខាធិការ រៀបចំស្នើសុំគោលការណ៍ ឯកឧត្តម អភិសន្តិបណ្ឌិត ដើម្បីរៀបចំកិច្ចប្រជុំផ្សព្វផ្សាយផែនការ លេខ០០៣ផ.ក និងសេចក្តីណែនាំ លេខ០០៤ស.ណ.ន/អ.អ ដល់រដ្ឋបាល និងស្នងការដ្ឋាននគរបាលរាជធានី ខេត្ត។
២. ជួយរៀបចំក្រុមការងារចុះត្រួតពិនិត្យតាមដានការអនុវត្តផែនការខាងលើ ដែលដឹកនាំដោយអគ្គនាយករងអន្តោប្រវេសន៍មួយចំនួន។
៣. ប្រគល់សិទ្ធិជូន ឯកឧត្តម ឧត្តមសេនីយ៍ឯក ណុប វី ប្រធានលេខាធិការដឹកនាំប្រគល់ភារកិច្ចដល់អនុប្រធាន និងសមាជិកទៅតាមជាក់ស្តែង ៕
