គំនិតផ្តួចផ្តើមអរិយធម៌សកល៖ រួមគ្នាធ្វើសកម្មភាពដើម្បីអនាគតប្រជាជនកម្ពុជា-ចិន

បន្ទាយមានជ័យ៖ កាលពីរសៀលថ្ងៃទី១២ ខែកញ្ញា ឆ្នាំ២០២៤ ក្រោមការគាំទ្រពីស្ថានទូតនៃសាធារណរដ្ឋប្រជាមានិតចិនប្រចាំនៅព្រះរាជាណាចក្រកម្ពុជា និងសាកលវិទ្យាល័យជាតិមានជ័យ សមាគមអ្នកស្រាវជ្រាវវឌ្ឍនភាពកម្ពុជា-ចិនបានរៀបចំកម្មវិធីបាឋកថាស្តីពីគំនិតផ្តួចផ្តើមអរិយធម៌សកល៖ រួមគ្នាធ្វើសកម្មភាពដើម្បីអនាគតប្រជាជនកម្ពុជា-ចិន។
ថ្លែងទៅកាន់អង្គពិធីដែលមានមន្ត្រីរាជការ សិស្ស-និស្សិត អ្នកចូលរួមសរុបមានចំនួន២០០នាក់ ឯកឧត្តម ជា សឿន សាកលវិទ្យាធិការ នៃសាកលវិទ្យាល័យជាតិមានជ័យបានគូសរំលេចថា ឆ្នាំ២០២៤ ជាឆ្នាំផ្លាស់ប្តូរប្រជាជនកម្ពុជានិងប្រជាជនចិន គឺជាឱកាសដែលអង្គពិធីទាំងមូល ជាពិសេសយុវជនត្រូវរួមចំណែកឱ្យកាន់តែសកម្មដើម្បីផ្សព្វផ្សាយកាន់តែទូលំទូលាយពីចំណងមិត្តភាពរវាងកម្ពុជានិងចិនដោយផ្តោតលើការសិក្សាស្រាវជ្រាវយល់ដឹងកាន់តែស៊ីជម្រៅពីគំនិតផ្តួចផ្តើមទាំង៤ដែលជាគតិបណ្ឌិតរបស់លោក Xi Jinping ប្រធានរដ្ឋចិន។
តាមរយៈបទបង្ហាញ និងសៀវភៅដែលទទួលបាននាថ្ងៃនេះ ឯកឧត្តមក៏បានសាទរចំពោះអង្គពិធីទាំងមូលដែលបានយល់យ៉ាងច្បាស់ពីគំនិតផ្តួចផ្តើមអរិយធម៌សកល ដើម្បីលើកកម្ពស់ការផ្លាស់ប្តូរនិងការរៀនសូត្រទៅវិញទៅមកក្នុងចំណោមអរិយធម៌ពិភពលោក និងលើកកម្ពស់ការកសាងសហគមន៍ជោគវាសនារួមនៃមនុស្សជាតិ ដែលក្នុងនោះ កម្ពុជានិងចិនគឺជាមិត្តដែកថែប និងកំពុងរួមគ្នាកសាងក្របខ័ណ្ឌកិច្ចសហប្រតិបត្តិការ «ត្បូងពេជ្រឆកោណ» ដែលបាននិងកំពុងផ្តល់ភាពកាន់តែប្រសើរឡើងនូវអនាគតកាន់តែបវរសម្រាប់ប្រជាជនកម្ពុជា។
លោក Lu Qizhi (លូ ឈីជឺ) អគ្គកុងស៊ុលចិនប្រចាំខេត្តសៀមរាបបានថ្លែងថា ក្នុងរយៈពេលមួយឆ្នាំកន្លងមកនេះ ចាប់តាំងពីការចាប់ផ្តើម គំនិតផ្តួចផ្តើមអរិយធម៌សកលបានដើរតួនាទីយ៉ាងសំខាន់ក្នុងការបង្កើតស្ថានភាពថ្មីសម្រាប់ការផ្លាស់ប្តូរអរិយធម៌ សមាហរណកម្មវប្បធម៌ និងចំណងមិត្តភាពរវាងប្រជាជននិងប្រជាជនក្នុងចំណោមប្រទេសជុំវិញពិភពលោក ហើយសម្រេចបានលទ្ធផលជាផ្លែផ្កា។ ប្រទេសចិន និងកម្ពុជា គឺជាប្រទេសដែលមានអរិយធម៌ដ៏ចំណាស់ ដែលមានប្រវត្តិសាស្ត្រ និងវប្បធម៌ដ៏រុងរឿង អរិយធម៌ចិន និងអរិយធម៌ខ្មែរ បានលាយបញ្ចូលគ្នា និងរៀនសូត្រពីគ្នាទៅវិញទៅមកក្នុងរយៈពេលជិតពីរពាន់ឆ្នាំនៃការផ្លាស់ប្តូរ និងអន្តរកម្ម។
ការលើកកម្ពស់ការផ្លាស់ប្តូរ និងការរៀនសូត្រទៅវិញទៅមករវាងអរិយធម៌ មិនត្រឹមតែជាបំណងប្រាថ្នា និងសេចក្តីប្រាថ្នារបស់ប្រជាជនចិន និងកម្ពុជាប៉ុណ្ណោះទេ ប៉ុន្តែក៏ជាតម្រូវការ និងអត្ថន័យពិតប្រាកដនៃការធ្វើការរួមគ្នា ដើម្បីកសាងសហគមន៍មួយដែលមានអនាគតរួមគ្នាសម្រាប់ប្រទេសចិន និងកម្ពុជា។
ក្នុងនាមសិស្ស-និស្សិត សាស្ត្រាចារ្យ មន្ត្រីរាជការដែលបានចូលរួមក្នុងអង្គបាឋកថានេះ លោក ជីវ សារិទ្ធ សាកលវិទ្យាធិការរងនៃសាកលវិទ្យាល័យមានជ័យ បានថ្លែងថា គំនិតផ្តួចផ្តើមអរិយធម៌សកលដែលត្រូវបានមហាសន្និបាតអង្គការសហប្រជាជាតិលើកទី៧៨បានពិគ្រោះពិភាក្សានិងអនុម័តជាឯកច្ឆន្ទសន្មតយកថ្ងៃទី១០ ខែមិថុនា ជារៀងរាល់ឆ្នាំ ជាទិវាអន្តរជាតិសម្រាប់កិច្ចសន្ទនារវាងអរិយធម៌ បាននិងកំពុងក្លាយជាចលករដល់កិច្ចការពារ សន្តិភាព ការអភិវឌ្ឍ និងវិបុលភាពដល់ពិភពលោក ហើយគំនិតផ្តួចផ្តើមអរិយធម៌សកលនេះបានរួមចំណែកជាមួយគំនិតផ្តួចផ្តើមនានាដែលបានផ្តួចផ្តើមដោយលោក Xi Jinping ប្រធានរដ្ឋចិនក្នុងការកសាងសហគមន៍ជោគវាសនារួមនៃមនុស្សជាតិ៕