ជំនួបពិភាភ្សាស្វែងរកការគាំទ្រ និងឱកាសសហការក្នុងការអនុវត្តក្របខ័ណ្ឌ ជំរុញបង្កើនការងារថែទាំសុខភាពបឋមនៅកម្ពុជា

ភ្នំពេញ៖ នាថ្ងៃទី១៣ ខែកញ្ញា ឆ្នាំ២០២៤ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ ក្រសួងសុខាភិបាល និងជាប្រធានក្រុមការងារជំរុញបង្កើនការថែទាំសុខភាពបឋមនៅកម្ពុជា (Task Force for PHC-BIF) បានទទួលជួបពិភាក្សាការងារជាមួយក្រុមការងារគម្រោងនិរន្តរភាពប្រព័ន្ធសុខាភិបាលតាមមូលដ្ឋាន ( Local Health System Sustainability Project)
នៃរដ្ឋវ៉ាស៊ីនតោន សហរដ្ឋអាមេរិក ។

កិច្ចប្រជុំពិភាក្សានេះ បានរៀបចំឡើងក្នុងគោលបំណងដើម្បី ផ្ដល់ការស្វែងយល់ទៅកាន់ក្រុមការងារគម្រោងនិរន្តរភាពប្រព័ន្ធសុខាភិបាលតាមមូលដ្ឋាន (LHSS) អំពីទិសដៅអាទិភាពនៃការអនុវត្តក្របខ័ណ្ឌជំរុញបង្កើនការងារថែទាំសុខភាពបឋមនៅកម្ពុជា (Primary Health Care Booster Implementation Framework in Cambodia) និង ផ្តល់ការគាំទ្រលេីការត្រៀមរៀបចំគម្រោងសំណើថវិកាទៅកាន់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) លើគម្រោង Sustainable Outcomes through Primary Healthcare Integration (SOPHI) របស់សហរដ្ឋអាមេរិក ដើម្បីចូលរួមជាមួយក្រសួងសុខាភិបាល ក្នុងការអនុវត្តក្របខ័ណ្ឌជំរុញបង្កើនការងារថែទាំសុខភាពបឋម។

កិច្ចប្រជុំនេះ បានធ្វើឡើងនៅទីស្ដីការក្រសួងសុខាភិបាល ដោយមានការចូលរួមពីតំណាងក្រុមការងារក្រសួងសុខាភិបាលដែលមកពី អគ្គនាយកដ្ឋានបច្ចេកទេសសុខាភិបាល, នាយកដ្ឋានផែនការ និងព័ត៌មានសុខាភិបាល និងមជ្ឈមណ្ឌលជាតិលើកកម្ពស់សុខភាព រួមទាំង តំណាងនៃគម្រោងនិរន្តរភាពប្រព័ន្ធសុខភិបាលតាមមូលដ្ឋាន (LHSS) នៃរដ្ឋវ៉ាស៊ីនតោន និងតំណាងក្រុមការងារគម្រោងនិរន្តរភាពប្រព័ន្ធសុខាភិបាលតាមមូលដ្ឋាន (LHSS Cambodia ) ប្រចាំប្រទេសកម្ពុជាផងដែរ ៕