ឯកឧត្តម ហ៊ុន ម៉ានី អញ្ជើញប្រកាសតែងតាំងឯកឧត្តម មាន ចាន់យ៉ាដា ជាប្រធានគណៈកម្មាធិការស.ស.យ.ក. ខេត្តឧត្តរមានជ័យ
ភ្នំពេញ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា នាព្រឹកថ្ងៃទី១៤ ខែកញ្ញា ឆ្នាំ២០២៤ បានអញ្ជើញជាអធិបតីក្នុងពិធីសម្ពោធអគារទីស្នាក់ការថ្មី និងពិធីប្រកាសទទួលស្គាល់សមាសភាពប្រធានគណៈកម្មាធិការស.ស.យ.ក. ខេត្តឧត្តរមានជ័យ ដែលមានទីតាំងនៅ ភូមិបុរីរដ្ឋបាល សង្កាត់សំរោង ក្រុងសំរោង ខេត្តឧត្តរមានជ័យ។
កម្មវិធីនេះមានការអញ្ជើញចូលរួមពីសំណាក់ ឯកឧត្តម គីម រិទ្ធី អនុប្រធានស.ស.យ.ក. ឯកឧត្តម លោកជំទាវ សមាជិក សមាជិកា គណៈអចិន្ត្រៃយ៍ គណៈកម្មាធិការកណ្តាលស.ស.យ.ក. រួមទាំងសមាជិក សមាជិកា ស.ស.យ.ក. ខេត្តឧត្តរមានជ័យ សរុបប្រមាណ ៣៦២រូប។
ជាកិច្ចចាប់ផ្តើម ឯកឧត្តម ប៉ែន កុសល្យ សមាជិកគណៈអចិន្ត្រៃយ៍គណៈកម្មាធិការកណ្តាល ស.ស.យ.ក បានសម្តែងនូវសេចក្តីសោមនស្សរីករាយ និងស្វាគមន៍យ៉ាងកក់ក្តៅចំពោះវត្តមានឯកឧត្តមអធិបតី និងអ្នកចូលរួមទាំងអស់ដែលបានមកចូលរួមក្នុងកម្មវិធីនាឱកាសនោះ។ ជាមួយគ្នានេះ ឯកឧត្តមបានធ្វើការរាយការណ៍អំពីសមិទ្ធផលសម្រេចបាននាពេលកន្លងមករបស់សមាជិក សមាជិកា ស.ស.យ.ក.ខេត្តឧត្តរមានជ័យ ដោយឯកឧត្តមបានគូសបញ្ជាក់ពីសមិទ្ធផលសំខាន់ៗមួយចំនួនរួមមាន ការកសាងសមត្ថភាពសមាជិកា សមាជិកា ការចូលរួមអនុវត្តយុទ្ធនាការពលរដ្ឋល្អ ការអនុវត្តសកម្មភាពផ្សព្វផ្សាយជូនប្រជាពលរដ្ឋ ការរៀបចំយន្តការបរិច្ចាគឈាមជាដើម។
បន្ទាប់ពីការអានសេចក្តីសម្រេចស្តីពីការទទួលស្គាល់ប្រធានកម្មាធិការស.ស.យ.ក.ខេត្តឧត្តរមានជ័យ ឯកឧត្តម គីម រិទ្ធី ក៏បានចែករំលែកនូវចំណាប់អារម្មណ៍សម្រាប់កម្មវិធីនាឱកាសនេះ។ ឯកឧត្តមបានគូសបញ្ជាក់ថា ក្នុងរយៈពេល ១២ ឆ្នាំនេះ ក្រោមការដឹកនាំដ៏ឈ្លាសវ៉ៃ ប្រកបដោយការយកចិត្តទុកដាក់ខ្ពស់ របស់ ឯកឧត្តម ហ៊ុន ម៉ានី ស.ស.យ.ក. បានធ្វើការវិវត្តខ្លួនឥតឈប់ឈរ រហូតអង្គការចាត់តាំងមួយនេះ អាចពង្រីកវិសាលភាពខ្លួន ជាពិសេសបាននាំមកនូវការបង្កើតស្នាក់ការថ្មីខេត្តឧត្តរមានជ័យដែលត្រូវដាក់សម្ពោធក្នុងថ្ងៃនេះផងដែរ។
ឯកឧត្តមបានបន្តថា អគារស្នាក់ការថ្មីនេះ នឹងត្រូវបានប្រើប្រាស់ជាមជ្ឈមណ្ឌលអប់រំ បណ្ដុះបណ្ដាល និងកីឡាផ្សេងៗ ព្រមទាំងជាទីកន្លែងសម្រាប់ការរៀបចំកម្មវិធី និងវេទិកាសង្គមនានា ដែលជាចំណេះដឹងទូទៅ និងជាប្រយោជន៍ដល់យុវជន។
នាឱកាសនោះ ឯកឧត្តម មាន ចាន់យ៉ាដា ប្រធាន ស.ស.យ.ក.ខេត្តឧត្តមានជ័យដែលទើបនឹងតែងតាំងថ្មី បានធ្វើការប្តេជ្ញាចិត្ត ក្នុងការគោរពឱ្យបានម៉ឺងម៉ាត់ហ្មត់ចត់នូវលក្ខន្តិកៈ បទបញ្ជាផ្ទៃក្នុងរបស់ស.ស.យ.ក. រក្សានូវសាមគ្គីភាព ធ្វើជាកម្លាំងស្នូលដ៏រឹងមាំ ខិតខំព្រូនជ្រំ ពង្រឹងពង្រីកកម្លាំងសាមគ្គីរបស់គ្រួសារស.ស.យ.ក. បន្តលើកកម្ពស់សមត្ថភាពយុវជនប្រកបដោយគុណវុឌ្ឍ និងសក្តានុពល និងគោរពនូវវីរៈភាពយុវជនរៀមច្បង បន្តចូលរួមសកម្មអភិវឌ្ឍស្ថាប័នសហភាពសហព័ន្ធ យុវជនកម្ពុជា ថែរក្សាគុណតម្លៃសហភាពសហព័ន្ធយុវជនកម្ពុជា ឱ្យមាននិរន្តរភាព៕ 
