ឯកឧត្តមរដ្ឋមន្ត្រី ថោ ជេដ្ឋា អញ្ជើញចូលរួមពិធីសម្ពោធដាក់ឱ្យប្រើប្រាស់ជាផ្លូវការការិយាល័យថ្មីរបស់ទីភ្នាក់ងារបារាំងសម្រាប់អភិវឌ្ឍន៍ (AFD) ប្រចាំប្រទេសកម្ពុជា

ភ្នំពេញ៖ នៅល្ងាចថ្ងៃចន្ទ ១៤កើត ខែភទ្របទ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៦ ខែកញ្ញា ឆ្នាំ២០២៤នេះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញចូលរួមក្នុងពិធីសម្ពោធដាក់ឱ្យប្រើប្រាស់ជាផ្លូវការការិយាល័យថ្មីរបស់ទីភ្នាក់ងារបារាំងសម្រាប់អភិវឌ្ឍន៍(AFD)ប្រចាំប្រទេសកម្ពុជា ក្រោមអធិបតីភាពដ៏ខ្ពង់ខ្ពស់ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។

សូមជម្រាបថា ទីភ្នាក់ងារបារាំងសម្រាប់អភិវឌ្ឍន៍ (AFD) មានវត្តមាននៅក្នុងប្រទេសកម្ពុជាតាំងពីឆ្នាំ១៩៩៣ ហើយស្ថិតក្នុងចំណោមស្ថាប័នធំៗ ដែលផ្តល់ហិរញ្ញប្បទានជួយដល់ប្រទេសកម្ពុជាក្រោយពេលចប់សង្គ្រាមស៊ីវិល។ ការគាំទ្ររបស់ទីភ្នាក់ងារបារាំងសម្រាប់អភិវឌ្ឍន៍ គឺផ្តោតលើផ្នែករចនាសម្ព័ន្ធសំខាន់ៗចំនួនពីរ៖ ការលើកកម្ពស់ការអភិវឌ្ឍទឹកដីប្រកបដោយតុល្យភាព ដូចជា ការទទួលបានសេវាមូលដ្ឋាន ការគ្រប់គ្រងធនធានទឹក និងការបន្សាំទៅនឹងការប្រែប្រួលអាកាសធាតុជាដើម និងការលើកកម្ពស់វិស័យផលិតកម្ម ដោយគោរពតាមស្តង់ដារបរិស្ថាន និងសង្គម ដូចជា ថាមពលកកើតឡើងវិញ និងការបណ្តុះបណ្តាលបច្ចេកទេសនិងវិជ្ជាជីវៈ ៕