សម្ដេចតេជោ ហ៊ុន សែន អបអរសាទរខួប១ឆ្នាំ នៃការដាក់បញ្ចូល «រមណីយដ្ឋានប្រាសាទកោះកេរ» ក្នុងបញ្ជីបេតិកភណ្ឌវប្បធម៌ពិភពលោក
ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា បានអបអរសាទរខួប១ឆ្នាំនៃការដាក់បញ្ចូល «រមណីយដ្ឋានប្រាសាទកោះកេរ» ក្នុងបញ្ជីបេតិកភណ្ឌវប្បធម៌ពិភពលោក ។
សម្ដេចបានសរសេរសារលើបណ្ដាញសង្គមហ្វេសប៊ុកថា នៅថ្ងៃទី១៧ ខែកញ្ញា ឆ្នាំ២០២៤នេះ ជាខួប១ឆ្នាំ (១៧ កញ្ញា ២០២៣-១៧ កញ្ញា ២០២៤) នៃការដាក់បញ្ចូលតំបន់ «រមណីយដ្ឋានប្រាសាទកោះកេរ» ក្នុងបញ្ជីបេតិកភណ្ឌវប្បធម៌ពិភពលោក ។
សម្ដេចតេជោបញ្ជាក់ថា «កិច្ចការពារសម្បត្តិវប្បធម៌ជាតិ ជាភារកិច្ចរបស់យើងគ្រប់ៗគ្នា»
រមណីយដ្ឋានបុរាណវិទ្យា ប្រាសាទកោះកេរ មានទីតាំងនៅក្នុងខេត្តព្រះវិហារ ហើយរមណីដ្ឋាននេះស្ថិតនៅលើផ្ទៃដីប្រមាណ ៨ពាន់ហិកតា ដែលមានប្រាសាទជាង៧០ ក្នុងនោះមានប្រាសាទធំមួយ ដែលត្រូវបានចាត់ទុកជាពីរ៉ាមីតនៅអាស៊ីអាគេ្នយ៍។ កោះកេរជាអតីតរាជធានីរបស់ខ្មែរក្នុងសតវត្សរ៍ទី១០ ដែលមានអាយុកាលជាង១ពាន់ឆ្នាំមកហើយ ហើយត្រូវបានកសាងដោយព្រះបាទជ័យវរ្ម័នទី៤ នៅពេលផ្លាស់ប្តូររាជធានីពីក្រុងអង្គរមកតំបន់កោះកេរ ៕
