ប្រធានាធិបតីអ៊ីរ៉ង់ អះអាងថា ក្រុងតេអេរ៉ង់មិនបានផ្ទេរអាវុធទៅឲ្យរុស្ស៊ីទេចាប់តាំងពីលោកឡើងកាន់តំណែង
ឌូបៃ៖ ប្រធានាធិបតីអ៊ីរ៉ង់ លោក Masoud Pezeshkian បានអះអាងកាលពីថ្ងៃចន្ទថា រដ្ឋាភិបាលរបស់លោក មិនបានផ្ទេរសព្វាវុធណាមួយទៅឱ្យរុស្ស៊ីទេ ចាប់តាំងពីបានចូលកាន់តំណែងក្នុងខែសីហា បន្ទាប់ពីមហាអំណាចលោកខាងលិចបានចោទប្រកាន់ទីក្រុងតេអេរ៉ង់ថា បានបញ្ជូនមីស៊ីលផ្លោងទៅកាន់ទីក្រុងមូស្គូកាលពីខែកញ្ញា។
សហរដ្ឋអាមេរិក និងសម្ព័ន្ធមិត្តរបស់ខ្លួនបានចោទប្រកាន់អ៊ីរ៉ង់កាលពីសប្តាហ៍មុនថាបានផ្ទេរមីស៊ីលផ្លោងទៅឱ្យរុស្ស៊ីសម្រាប់សង្គ្រាមរបស់ខ្លួននៅអ៊ុយក្រែន ដោយបានដាក់ទណ្ឌកម្មថ្មីលើទីក្រុងម៉ូស្គូ និងក្រុងតេអេរ៉ង់។
នៅពេលសួរថាតើអ៊ីរ៉ង់បានផ្ទេរកាំជ្រួចទៅឱ្យរុស្ស៊ីឬអត់នោះ លោក Pezeshkian បានប្រាប់សន្និសីទសារព័ត៌មានតាមទូរទស្សន៍ថា វាអាចទៅរួចដែលថាការប្រគល់នេះបានកើតឡើងកាលពីអតីតកាល ប៉ុន្តែលោកអាចធានាចំពោះអ្នកថាចាប់តាំងពីលោកឡើងកាន់តំណែងមក មិនមានការបញ្ជូនបែបនេះទៅឱ្យរុស្ស៊ីទេ។
រ៉យទ័របានរាយការណ៍កាលពីខែកុម្ភៈថា អ៊ីរ៉ង់បានផ្តល់ឲ្យរុស្ស៊ីនូវកាំជ្រួចមីស៊ីលផ្លោងពីដីទៅដីដ៏មានអានុភាពជាច្រើន ដែលធ្វើឱ្យកិច្ចសហប្រតិបត្តិការយោធាកាន់តែស៊ីជម្រៅរវាងប្រទេសទាំងពីរដែលត្រូវបានដាក់ទណ្ឌកម្មដោយសហរដ្ឋអាមេរិក។
