ឯកឧត្តម មាន ចាន់យ៉ាដា ប្តេជ្ញាចិត្ត ៨ចំណុច ដើម្បីជាសក្ខីភាព ឆ្លើយតបចំពោះការផ្តល់សេចក្តីទុកចិត្ត និងការគាំទ្រដ៏មុតមាំ របស់ថ្នាក់ដឹកនាំកាកបាទក្រហមកម្ពុជា
ភ្នំពេញ៖ ដើម្បីជាសក្ខីភាព និងឆ្លើយតបទៅនឹងគុណូប្បការដ៏ឧត្តុង្គឧត្តម ចំពោះការផ្តល់សេចក្តីទុកចិត្ត និង ការគាំទ្រដ៏មុតមាំ របស់ថ្នាក់ដឹកនាំកាកបាទក្រហមកម្ពុជា ក៏ដូចជាសមាជិក សមាជិកា នៃគណៈ កម្មាធិការសាខាកាកបាទក្រហមកម្ពុជាខេត្តទាំងអស់ ឯកឧត្តម មាន ចាន់យ៉ាដា អភិបាលខេត្ត និងជាសមាជិកគណៈកម្មាធិការកណ្តាល កក្រក ជាប្រធានគណៈកម្មាធិការសាខាកាកបាទក្រហមកម្ពុជា ខេត្តឧត្តរមានជ័យ បានធ្វើការប្តេជ្ញាចិត្តចំណុច៨ចំណុចសំខាន់ៗ ។
ការប្ដេជ្ញាចិត្តទាំង ៨ចំណុច របស់ឯកឧត្តម មាន ចាន់យ៉ាដា ធ្វើឡើងក្នុងពិធីសន្និបាតសាខាកាកបាទក្រហមកម្ពុជាខេត្តឧត្តរមានជ័យ នាថ្ងៃទី១៨ ខែកញ្ញា ឆ្នាំ២០២៤នេះ ដែលរួមមានដូចខាងក្រោម៖
១. ប្តេជ្ញាគោរពនូវគោលការណ៍គ្រឹះទាំង៧ របស់ចលនាកាកបាទក្រហម និងអឌ្ឍចន្ទក្រហម
២- ប្តេជ្ញាខិតខំយកចិត្តទុកដាក់ ជួយសង្គ្រោះប្រជាពលរដ្ឋដែលងាយរងគ្រោះ និងរងគ្រោះដោយគ្រោះ មហន្តរាយផ្សេងៗឱ្យបានទាន់ពេលវេលា
៣- ប្តេជ្ញាពង្រឹងអ្នកស្ម័គ្រចិត្តកាកបាទក្រហម ដែលបានបណ្តុះបណ្តាលហើយតាមភូមិ នីមួយៗ ទូទាំងខេត្ត តាមរយៈការចុះជួប និងផ្តល់វគ្គបំប៉ន
៤- ប្តេជ្ញាយកអស់កម្លាំងកាយចិត្ត បំផុសផ្សព្វផ្សាយគោលការណ៍ និង សកម្មភាពនានារបស់កាកបាទក្រហម កម្ពុជាក៏ដូចជាសាខា ដើម្បីចលនាចូលរួមពីសំណាក់ប្រជាពលរដ្ឋចូលជាសមាជិកភាពឱ្យបាន១% នៃ ចំនួនប្រជាពលរដ្ឋទូទាំងខេត្ត
៥- ប្តេជ្ញាពង្រឹងពង្រីកសមាជិកភាពតាមបណ្តាមន្ទីរ អង្គភាពនានាជុំវិញខេត្ត និងស្រុកក្រុងឱ្យបាន ១០០% នាឆ្នាំ ២០២៥-២០៣០
៦- ទំនាក់ទំនងល្អជាមួយគណៈកិត្តិយសសាខា គណៈកម្មាធិការសាខា ក្រុមប្រតិបត្តិសាខា និងអនុសាខា តាមបណ្តាក្រុង/ស្រុក ទូទាំងខេត្ត
៧- បំផុសចលនាកៀងគរមូលនិធិពីគ្រប់ប្រភព ដើម្បីនិរន្តភាពសកម្មភាពមនុស្សធម៌
៨- ធ្វើការទំនាក់ទំនងល្អជាមួយដៃគូសហប្រត្តិបត្តិការ។
ឯកឧត្ដម ក៏បានគោរពជូនពរ និងសូមប្រសិទ្ធពរជូនគណៈអធិបតី លោកជំទាវ ឯកឧត្តម អ្នកឧកញ៉ា ឧកញ៉ា លោក លោកស្រី ជាភ្ញៀវកិត្តិយស សមាជិក សមាជិកា អង្គសន្និបាតទាំងអស់ សូមមានថាមពលខ្លាំងក្លា ប្រាជ្ញាឈ្លាសវៃ ដើម្បីរួមគ្នាបំពេញបេសកកម្មការងារមនុស្សធម៌ជូនជាតិ មាតុភូមិ និងប្រជាននៅមូលដ្ឋានខេត្តរបស់ យើង ប្រកបដោយជោគជ័យថ្មីៗថែមទៀត និងសូមទទួលបាននូវពុទ្ធពរទាំង ៤ ប្រការគឺ អាយុ វណ្ណៈ សុខៈ និង ពលៈ កុំបីឃ្លៀងឃ្លាតឡើយ ៕
