អារ៉ាប៊ីសាអូឌីត ដាក់ឈ្មោះលក្ខខណ្ឌសម្រាប់ការធ្វើជំនួញជាមួយអ៊ីស្រាអែល
បរទេស៖ រាជទាយាទអារ៉ាប៊ីសាអូឌីត Mohammed bin Salman បានប្រកាសថា មិនអាចមានប្រក្រតីភាពនៃទំនាក់ទំនងរវាងទីក្រុងរីយ៉ាដ និងក្រុងហ្សេរុយសាឡឹមខាងលិច ប្រសិនបើគ្មានការបង្កើតរដ្ឋប៉ាឡេស្ទីនឯករាជ្យនោះទេ។
ព្រះអង្គម្ចាស់ធ្លាប់មានបន្ទូលថា កិច្ចចរចាដែលគាំទ្រដោយសហរដ្ឋអាមេរិករវាងអារ៉ាប៊ីសាអូឌីត និងអ៊ីស្រាអែលគឺជិតដល់ដំណោះស្រាយមួយ មុនពេលជម្លោះនៅតំបន់ហ្គាហ្សាបានផ្ទុះឡើងកាលពីខែតុលាឆ្នាំមុន។
លោក Bin Salman បានឲ្យដឹងកាលពីថ្ងៃពុធថា ព្រះរាជាណាចក្រនឹងមិនបញ្ឈប់ការងារដែលមិនចេះនឿយហត់របស់ខ្លួនឆ្ពោះទៅរកការបង្កើតរដ្ឋប៉ាឡេស្ទីនឯករាជ្យមួយដែលមានទីក្រុងហ្សេរុយសាឡឹមខាងកើតជារដ្ឋធានីរបស់ខ្លួននោះទេ ហើយយើងបញ្ជាក់ថា ព្រះរាជាណាចក្រនឹងមិនបង្កើតទំនាក់ទំនងការទូតជាមួយអ៊ីស្រាអែលដោយគ្មានវាទេ នេះបើយោងតាមសារព័ត៌មាន Reuters។
លោកក៏បានថ្កោលទោសឧក្រិដ្ឋកម្មនៃការកាន់កាប់របស់អ៊ីស្រាអែល ប្រឆាំងនឹងប្រជាជនប៉ាឡេស្ទីន។
យោងតាមប្រភពអនាមិកពីរដែលបានប្រាប់ទៅកាន់ Reuters ការធ្វើឱ្យប្រក្រតីភាព នៃទំនាក់ទំនងរវាងអារ៉ាប៊ីសាអូឌីត និងអ៊ីស្រាអែល ត្រូវបានគេមើលឃើញថាជាតម្រូវការជាមុនសម្រាប់ទីក្រុងរីយ៉ាដក្នុងការធានាកិច្ចព្រមព្រៀងការពារជាតិជាមួយទីក្រុងវ៉ាស៊ីនតោន។
ការប្រកាសរបស់លោក Bin Salman ធ្វើឡើងមុនពេលមហាសន្និបាតអង្គការសហប្រជាជាតិ ត្រូវបានកំណត់ដើម្បីបោះឆ្នោតលើដំណោះស្រាយទាមទារឱ្យបញ្ចប់ការកាន់កាប់ទឹកដីប៉ាឡេស្ទីនរបស់អ៊ីស្រាអែល។
ឯកអគ្គរដ្ឋទូតអ៊ីស្រាអែលប្រចាំអង្គការសហប្រជាជាតិ លោក Danny Danon បានហៅសេចក្តីព្រាងដំណោះស្រាយនេះថា អំពើភេរវកម្មការទូត ហើយបានរិះគន់ថា ខ្លួនមិនបានបរិហារការវាយប្រហារកាលពីថ្ងៃទី៧ ខែតុលា ឆ្នាំ២០២៣ ដោយក្រុមហាម៉ាសចេញពីតំបន់ហ្គាហ្សា។ ប្រេសិតអាមេរិក Linda Thomas-Greenfield បានប្រកែកប្រឆាំងនឹងដំណោះស្រាយនេះផងដែរ។
ដំណោះស្រាយនេះបានអំពាវនាវឱ្យអ៊ីស្រាអែល បញ្ចប់ដោយមិនពន្យារពេលវត្តមានខុសច្បាប់របស់ខ្លួននៅក្នុងទឹកដីប៉ាឡេស្ទីនដែលកាន់កាប់ មិនលើសពី ១២ខែចាប់ពីពេលនេះ និងផ្តល់សំណងដល់ប៉ាឡេស្ទីនសម្រាប់ការខូចខាតដែលបណ្តាលមកពីការកាន់កាប់។ វាត្រូវបានអនុម័តដោយមានសម្លេងគាំទ្រ ១២៤សម្លេង, សម្លេងប្រឆាំង ១២សម្លេង និងសម្លេងអនុប្បវាទ ៤៣សម្លេង។
អ៊ីស្រាអែលបានបន្ទោសការលុកលុយរបស់ក្រុមហាម៉ាសចំពោះការសម្លាប់មនុស្ស១.២០០នាក់ និងនិយាយថាមនុស្ស២៥០នាក់ទៀតត្រូវបានចាប់ជាចំណាប់ខ្មាំង។ យោងតាមក្រសួងសុខាភិបាលនៃតំបន់នេះ ជនជាតិប៉ាឡេស្ទីនជាង ៤១,០០០នាក់ត្រូវបានសម្លាប់នៅក្នុងប្រតិបត្តិការយោធារបស់អ៊ីស្រាអែលចាប់តាំងពីពេលនោះមក ខណៈដែលជាង ៩៥,០០០នាក់បានរងរបួស។
