ក្រសួងធម្មការ ណែនាំពីការត្រៀមអន្តរាគមន៍ករណីមានគ្រោះទឹកជំនន់និងគ្រោះមហន្តរាយផ្សេងៗ
ភ្នំពេញ៖ ក្រសួងធម្មការ និងសាសនា បានចេញសេចក្តីណែនាំ ស្តីពីការត្រៀមអន្តរាគមន៍ករណីមានគ្រោះទឹកជំនន់និងគ្រោះមហន្តរាយផ្សេងៗ។
អនុវត្តតាមអនុសាសន៍ណែនាំដ៏ខ្ពង់ខ្ពស់បំផុតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី១៨ ខែកញ្ញា ឆ្នាំ២០២៤ ក្នុងការណែនាំដល់បណ្តាក្រសួង ស្ថាប័ន អភិបាលរាជធានី ខេត្ត និងកម្លាំងប្រដាប់អាវុធទាំងអស់ត្រៀមលក្ខណៈអន្តរាគមន៍ជួយសង្គ្រោះ ក្នុងករណីគ្រោះទឹកជំនន់កើតមានជាយថាហេតុ និងសេចក្តីជូនដំណឹងរបស់ក្រសួងធនធានទឹក និងឧតុនិយម ចុះថ្ងៃទី១៨ ខែកញ្ញា ឆ្នាំ២០២៤ ស្តីពីស្ថានភាពអាកាសធាតុ ព្យុះទី១៤ ឈ្មោះ ពូលឡាស៊ាន (Pulasan) ជាមួយនឹងសម្ពាធទាបដែលកើតឡើងនៅសមុទ្រចិនខាងត្បូង ធ្វើឱ្យបណ្តាខេត្តមួយចំនួនអាចរងគ្រោះ ដោយទឹកជំនន់ និងគ្រោះមហន្តរាយផ្សេងៗ ក្នុងនោះក្រសួងធម្មការ និងសាសនា សូមធ្វើការណែនាំដល់ លោកប្រធាន មន្ទីរធម្មការ និងសាសនារាជធានី ខេត្ត ទាំង២៥ សហការជាមួយសាលាគណរាជធានី ខេត្ត និងថ្នាក់ដឹកនាំពាហិរសាសនាគ្រប់និកាយទាំងអស់ ដើម្បីអនុវត្តនូវគោលការណ៍ណែនាំដូចខាងក្រោម៖
-ត្រូវយកចិត្តទុកដាក់ប្រុងប្រយ័ត្នខ្ពស់ តាមដានឱ្យជាប់ជាប្រចាំ និងដោះស្រាយឱ្យទាន់ពេលវេលា ក្នុងករណី ដែលមានទឹកជំនន់លិចវត្តអារាម សាលាពុទ្ធិកសិក្សាគ្រប់កម្រិត និងអារាមពាហិរ សាសនាផ្សេងៗ ជាពិសេសយកចិត្តទុកដាក់ខ្ពស់ក្នុងការជួយសង្គ្រោះចំពោះសាមណេរតូចៗ ព្រះសង្ឃជរា បព្វជិតសាសនាជរា និងគរុភណ្ឌវត្តផ្សេងៗ។
-ត្រូវយកចិត្តទុកដាក់ក្នុងការផ្គត់ផ្គង់ចង្ហាន់ប្រគេនព្រះសង្ឃ ឬស្បៀងអាហារផ្សេងៗដល់បព្វជិត សាសនា និងជនងាយរងគ្រោះស្នាក់នៅតាមទីអារាមសាសនាដូចជា ជនចាស់ជរា កុមារ និង ជនមានពិការភាព។
-ត្រូវត្រៀមរៀបចំឱ្យមានទីទួលសុវត្ថិភាព នៅតាមអារាមសាសនាសម្រាប់ជាទីស្នាក់នៅ បណ្តោះអាសន្នដល់ជនរងគ្រោះ និងជនងាយរងគ្រោះ។
-ត្រូវសហការជាមួយព្រះមន្ត្រីសង្ឃ ថ្នាក់ដឹកនាំពាហិរសាសនា អាជ្ញាធរមូលដ្ឋាននិងប្រជាបរិស័ទ ទាំងអស់ក្នុងការកៀគរធនធានផ្សេងៗ ពិសេសស្បៀងអាហារ ដើម្បីផ្តល់ជំនួយសង្គ្រោះបន្ទាន់ ដល់ជនរងគ្រោះ និងជនងាយរងគ្រោះ។
-ត្រូវចាត់មន្ត្រីបង្គោលក្នុងការសហការជាមួយព្រះមន្ត្រីសង្ឃវត្ត ឬ ជនបង្គោលរបស់ពាហិរសាសនាទាំងអស់ ដើម្បីតាមដានពិនិត្យមើលស្ថានភាព និងត្រៀមវិធានការណ៍ចាំបាច់ ព្រមទាំងផ្តល់កិច្ច អន្តរាគមន៍បន្ទាន់ ដើម្បីឆ្លើយតបទៅនឹងតម្រូវការចាំបាច់ផ្សេងៗ។
-ត្រូវចូលរួមធ្វើការណែនាំ និងអប់រំផ្សព្វផ្សាយ ដល់គ្រប់វត្តអារាម និងអារាមពាហិរសាសនាទាំងអស់ ដែលនៅក្នុងតំបន់រងគ្រោះឱ្យយកចិត្តទុកដាក់លើសុខភាព អនាម័យ ដើម្បីជៀសវាងជំងឺឆ្លងផ្សេងៗ។
-ធ្វើរបាយការណ៍ស្តីពីស្ថានភាពធាតុអាកាសនៃប្រព័ន្ធសម្ពាធទាប ស្ថានភាពទឹកជំនន់ និងផល ប៉ះពាល់លើវិស័យសាសនាឱ្យបានជាប្រចាំ និងទាន់ពេលវេលាមកក្រសួងធម្មការនិងសាសនា។
-ត្រូវសហការជាមួយក្រុមការងារលេខាធិការដ្ឋានគ្រប់គ្រងគ្រោះមហន្តរាយ ក្រសួងធម្មការនិងសាសនា អគ្គនាយក នៃអគ្គនាយកដ្ឋានកិច្ចការសាសនា ព្រះអគ្គាធិការ នៃអគ្គាធិការដ្ឋានពុទ្ធិកសិក្សាជាតិ ដើម្បីធ្វើការវាយតម្លៃពីផលប៉ះពាល់ ដែលបណ្តាលមកពីគ្រោះមហន្តរាយ និងការធ្វើផែនការ ស្តារឡើងវិញ ៕