ឧបនាយករដ្ឋមន្ត្រី ហង់ជួន ណារ៉ុន ដឹកនាំកិច្ចប្រជុំស្តីពីសេចក្តីព្រាងច្បាប់អប់រំកាយ និងកីឡា

ភ្នំពេញ៖ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី១៩ ខែកញ្ញា ឆ្នាំ២០២៤ បានដឹកនាំកិច្ចប្រជុំស្តីពីសេចក្តីព្រាងច្បាប់អប់រំកាយ និងកីឡា ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួង និងមន្ត្រីពាក់ព័ន្ធក្រោមឱវាទ។

គោលបំណងនៃកិច្ចប្រជុំនេះ គឺដើម្បីបង្ហាញខ្លឹមសារ:សំខាន់ៗពីសេចក្តីព្រាងច្បាប់ស្តីពីការអប់រំកាយ និងកីឡា ព្រមទាំងធ្វើការពិនិត្យ និងពិភាក្សាប្រមូលធាតុចូលរបស់អ្នកពាក់ព័ន្ធសំខាន់ៗដើម្បីធ្វើអោយសេចក្តីព្រាងច្បាប់នេះកាន់តែមានភាពពេញលេញ និងគ្រប់ជ្រុងជ្រោយ។

បន្ទាប់ពីបានផ្លាស់ប្ដូរមតិយោបល់ និងកែសម្រួលលើសេចក្តីព្រាងច្បាប់នេះ ឯកឧត្ដមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណដល់ក្រុមការងារពាក់ព័ន្ធទាំងអស់ ដែលបានខិតខំប្រឹងប្រែងរៀបចំ ពិនិត្យមើល ក៏ដូចជាកែលម្អលើសេចក្តីព្រាងច្បាប់នេះនាពេលកន្លងមក និងបានណែនាំឱ្យក្រុមការងារពាក់ព័ន្ធ រៀបចំកិច្ចប្រជុំដោយឡែក និងយកចិត្តទុកដាក់លើកិច្ចការងារតាមជំនាញ ជាពិសេសផ្តោតលើគោលការណ៍ធំៗ ដូចជានិយមន័យ និងខ្លឹមសារដោយអាចសិក្សាពីប្រទេសដ៏ទៃបានដើម្បីជាមូលដ្ឋាន គោរពទៅតាមបទប្បញ្ញត្តិជាតិ និងអន្តរជាតិ ស្វែងរកនូវចំណុចខ្វះខាតផ្សេងៗ និងព្យាយាមកែសម្រួលឱ្យកាន់តែល្អប្រសើរបន្ថែមទៀត។

គួរបញ្ចាក់ដែរថា សេចក្តីព្រាងច្បាប់នេះត្រូវបានក្រសួងអប់រំ យុវជន និងកីឡា ក៏ដូចជាស្ថាប័នពាក់ព័ន្ធបានបើក សិក្ខាសាលា និងកិច្ចប្រជុំពិភាក្សាជាច្រើនលើកមកហើយ ដើម្បីប្រមូលធាតុចូល ក្នុងគោលដៅធ្វើឱ្យសេចក្តីព្រាងច្បាប់ស្តីពីវិស័យអប់រំកាយ និងកីឡានេះកាន់តែមានលក្ខណៈគ្រប់ជ្រុងជ្រោយ និងមានប្រសិទ្ធភាពក្នុងការអនុវត្ត៕